بۇنداي شارا وبلىس ورتالىعىندا ءبىرىنشى رەت وتكىزىلىپ وتىرعان جوق. بۇعان دەيىن «Jetisy-creative days» فەستيۆالى وتكەن ەدى. وندا 5 ءتۇرلى شىعارماشىلىق سالاداعى كىل مىقتىلار جينالىپ، ءوز تاجىريبەلەرىمەن ءبولىستى. «ART فورۋم» وسىنىڭ جالعاسى دەسەك ارتىق ايتقاندىق ەمەس.
فورۋم، تەك شەبەرلىك ساعاتىمەن شەكتەلگەن جوق. وندا كەلگەن سۋرەتشى، فوتوگراف، مۋرالشىلاردىڭ تۋىندىلارى كوپشىلىك نازارىنا شاعىن كورمە اياسىندا ۇسىنىلدى. بۇل دا كرەاتيۆتى كوزقاراستاعى تۇلعالاردىڭ تانىم كوكجيەگىن كەڭەيتۋگە باعىتتالعان جۇمىستارىنىڭ بىرەگەيى.
سۋرەت سالۋ ونەرى «ەكىنىڭ ءبىرى، ەگىزدىڭ سىڭارىنا» بەرىلە بەرمەيتىن اسا كەرىم دۇنيە. ونىڭ سان ءتۇرلى ءيىرىمىن يگەرۋ كەز كەلگەننىڭ قولىنان كەلە بەرمەيدى. ايتسەدە، سۇلۋ ونەردى ءومىرىنىڭ ورنەگىنە اينالدىرعانداردا بار. ەرەكشە قولتاڭباسى مەن قايتالانباس قابىلەتىنىڭ ارقاسىندا دارالانعان دارابوزدار فورۋمدا توبە كورسەتتى. بۇل قاتاردا، ەۋرازيا جانە قازاقستان ديزاينەرلەر وداعىنىڭ مۇشەسى، قازاقستان سۋرەتشىلەر وداعىنىڭ مۇشەسى، ت.جۇرگەنوۆ اتىنداعى قازاق ۇلتتىق اكادەمياسىنىڭ ساندىك قولدانبالى ونەر كافەدراسىنىڭ وقىتۋشىسى باۋىرجان دوسجانوۆ، قازاقستان رەسپۋبليكاسى سۋرەتشىلەر وداعىنىڭ مۇشەسى، ءتۇرلى سۋرەت كورمەلەرىنىڭ اۆتورى ءمولدىر ساعىندىقوۆا مەن جۇرگەنوۆ اتىنداعى قازاق ۇلتتىق ونەر اكادەمياسىنىڭ وقىتۋشىسى، قازاقستان سۋرەتشىلەر وداعىنىڭ مۇشەسى داۋرەنبەك بەكنازاروۆ جانە Gray ONE گراففيتي سۋرەتشىسى سەرگەي ناگورنىحتار بار.
فورۋمعا قاتىسۋشى شەبەرلەر ءتۇرلى تاقىرىپتاعى تۋىندىلاردى قاس-قاعىم ساتتە بەينەلەپ،تاڭداي قاقتىرىپ، ەلدىڭ سۇيىسپەنشىلىگىنە بولەندى.
سولاردىڭ ىشىندە، زاماناۋي كيىز باسۋ تەحنولوگيالارىنىڭ پانەلدەرى نەگىزىندە «وشاعىڭ سونبەسىن» اتتى تۋىندىنى باسا ايتقان ابزال. ءتۇرلى-تۇستى كيىزدىڭ كومەگىمەن جاسالعان كەسكىندەمە كوزدىڭ جاۋىن الادى. مۇندا، قازاققا ءتان بولمىس، وتباسىنداعى قۇندىلىق بەينەلەنگەن. شىعارمانىڭ اتى زاتىنا ساي. تاماشالۋشى جاندى تامساندىراتىن ادەمىلىكتىڭ اۆتورى-باۋىرجان دوسجانوۆ. ونىڭ ايتۋىنشا، كيىزدەن سۋرەت سالۋ اسقان ىجداحاتتىلىقتى تالاپ ەتەدى.
«كيىز باسۋدى كەزىندە اجەلەرىمىزدەن كورىپ وستىك. ءبىر قاراعان كوزگە وتە جەڭىل كورىنگەنىمەن ونى جاساۋدىڭ ءوزى ۇلكەن پروسەسس. بۇگىندە تەحنولوگيا دامىعان. قولدان ءجۇندى ءتۇتۋدىڭ قاجەتى شامالى. دايىن شيكىزاتتى الىپ، ونى قالاۋىمىزشا تۇستەرگە بوياپ، كوڭىلىمىزگە جاتقان سۇلبانى شىعارۋعا تىرىسامىز. بۇگىنگى فورۋمعا تاڭداعان تاقىرىبىم «وشاعىڭ سونبەسىن» دەپ اتالادى. مۇندا قاراپايىم عانا تابيعات پەن قازاقتىڭ كيىز ءۇيىن بەينەلەدىم. وسى ارقىلى جىلۋلىق، ءتۇتىنى ءتۇزۋ شىققان وتباسىندا ەكەنىن كورسەتكىم كەلدى. مەندىك تۇيسىك وسىعان سايادى»،-دەيدى باۋىرجان تاتتىبەك ۇلى.
فورۋمعا كەلۋشىلەردىڭ جانارىن جاۋلاعان تاعى ءبىر سۋرەتتىڭ سالۋ ءادىسى تىم ەرەكشە بولدى. گراففيتي سۋرەتشى سەرگەي ۆاسيليەۆيچ Arton ياعني سۋرەت سالۋعا ارنالعان بوياۋدىڭ كومەگىمەن سانتا-كلاۋستى بەينەلەپ شىقتى. قىلقالاممەن جۇمىس جاساۋدىڭ ءوزى ەپتىلىكتى قاجەت ەتەتىن ەسكەرسەك، باللوندى قولدانۋ ارقىلى اۋقىمدى تۋىندىنى شىعارۋ وڭاي ەمەس. سونداي-اق، داۋرەنبەك بەكنازاروۆ پەن ءمولدىر ساعىندىقوۆانىڭدا جۇمىستارى ەلدىڭ كوڭىلىنەن شىقتى. شىعارماشىلىق تۇلعاعا سەرپىلىس سىيلاعان فورۋمعا كەلۋشىلەر سىرباز ونەردىڭ سىرىنا قانىعىپ، تەرەڭىنە بويلاپ تارقاستى.
