Zámzagúl Faizollanova kópshilikke Bopai laqap atymen tanymal sportshy. Ol – dziýdo, qazaq kúresi, erejesiz jekpe-jek siiaqty úsh sporttyń sheberi ǵana emes, aiaýly jar, úsh balanyń anasy, eki joǵary bilimi bar áskeri qyzmetker. Sport kúnine orai BAQ.KZ tilshisi sportshymen suhbattasty.
– Zámzagúl, sportqa qalai keldińiz?
– Meni sportqa 8 jasymda ákem alyp keldi. Ákem – sambo, qazaq kúresi, sýmo, dziýdo siiaqty kúres túrlerinen sport sheberi. Sol sebepti kishkentaiymnan sportqa degen qyzyǵýshylyǵym qalyptasty. Basynda gimnastika, jeńil atletika, júzýmen ainalystym, keiin dziýdoǵa keldim. Basynda bul da ýaqytsha dep oiladym, biraq dziýdony shyn unatyp qaldym. Bar bolǵany bir ai daiyndalyp, alǵashqy jarysymda ekinshi oryn aldym. Sodan bastap ákem men bapkerlerim maǵan senip, qoldaý kórsetti.
– Dziýdo men qazaq kúresi arasynda qandai aiyrmashylyqtar bar?
– Eki sport túri de aila men daiyndyqty talap etedi. Biraq aiyrmashylyǵy – dziýdoda parterde kúresýge bolady, al qazaq kúresinde ondai múmkindik joq. Al erejesiz jekpe-jekte osy eki kúrestegi tásilder óte qajet. Maǵan tek bokstan qol qoiý jetispedi, qolymdy qoiǵan soń jekpe-jekke de shyǵa bastadym.
– Sizdiń "Bopai" degen laqap atyńyz bar. Ol qaidan shyqty?
– Meniń atymdy Zámzagúl dep ájem qoiǵan. Bálkim Mekkege baryp, zámzám sýyn ishýdi armandaǵany úshin shyǵar. Al "Bopai" – Kenesary hannyń qaryndasy, Kishi júz hany Ábilhaiyrdyń jary, batyr, qaisar áiel. Burynǵy menedjerim meniń boiymnan sol qasietterdi kórip, "Bopai" dep atap ketken. Iaǵni, men bastasam, sońyna deiin baramyn.
– Ákeńiz sporttyq mansabyńyzǵa erekshe áser etken siiaqty.
– Iá, ákem Faizolla Qoishymanov meniń ómirlik ustazym. Ol maǵan sport arqyly adal eńbek etýdi úiretti. Ákem: "Ómirde shyndyqty tabý qiyn, al sportta bári teń, kim kóp eńbektense sol jeńedi" dep aitatyn. Bul men úshin ómirlik qaǵida.
– Eki joǵary bilimińiz bar eken. Oqýǵa qalai úlgerdińiz?
– Anam Gaýhar Qoishymanova úshin bizdiń bilim alýymyz óte mańyzdy boldy. Ol ózi ýniversitetke túse almaǵan. Mende eki bakalavr, bir magistratýra bar. Doktorantýraǵa tapsyryp, 15 ball jetpei qaldy. Sol qujattarmen zań mamandyǵyna ekinshi joǵary bilimge tapsyryp, jaqsy baǵalarmen bitirip shyqtym.
– Sport pen otbasyn qatar alyp júrý qiyn emes pe?
– 2018 jyly turmysqa shyqtym. Kúieýim Myqtybek ekeýmizdiń úsh balamyz bar: eki ul, bir qyz. Kezinde AQSh-qa ketip, UFC-de óner kórsetkim keldi, biraq viza bermedi. Sol kezde Myqtybek "Sen talai jyl tatamide kúrestiń, endi bala súiip, óziń úshin ómir súrgiń kelmei me?" dedi. Sóitip otbasyn qurdyq. Ol meni jaqsy túsinedi, men erkindikti jaqsy kóremin. Keide qysym kóp bolsa, jarylyp ketýim múmkin. Sondyqtan qoldaýy úshin rizamyn.
– Úsh baladan keiin sportqa qaita oralý qanshalyqty qiyn boldy?
– Oralýǵa bolady, biraq qiyn. Uldarymnan keiin tez qalypqa keldim, al qyzymdy bosanǵanda 22 keli salmaq qosyp aldym. Qazir sonyń 16-syn áreń tastadym. Árine, balalarǵa kóbirek ýaqyt bólgim keledi, biraq olar mahabbattan kende emes, jaqyndarym kómektesip jatyr.
– Kásipqoi sportta qandai jetistikterińizdi erekshe atar edińiz?
– Dziýdodan bes dúrkin, qazaq kúresinen jeti dúrkin Qazaqstan chempionymyn, "Kóshpendiler oiyndarynyń" júldegerimin. Alash Pride ligasynyń alǵashqy chempiony retinde qazir de titýlymdy qorǵaimyn. MMA-da jetistikke jetý – minezimniń arqasy. Asa tózimdi bolmasań, bul sportta óner kórsete almaisyń. Jekpe-jekke kez kelgen qarsylasqa shyǵýǵa daiynmyn. Qazir 78 kg salmaqta qarsylas tabý qiyn, “bergenin alamyn”.
– Kezinde jaraqattarmen de kúreskenińiz belgili. Qazir densaýlyǵyńyz qalai?
–Buryn AQSh-ta muryn synǵan kúide, keide saýsaq synǵanmen de jekpe-jekke shyqqan kezder boldy. Biraq ol kezde tek qarsylasty jeńý týraly oilaisyń. Qazir aýyr jaraqattar joq, densaýlyǵym jaqsy.
– Siz sportshy ǵana emes, áskeri qyzmetkersiz. Bul salaǵa qalai keldińiz?
– Men 8-synyptan bastap Armiia ortalyq sport klýbynda boldym. 19 jasymda áskerge shaqyryldym. Bir aidan keiin áskeri Olimpiadaǵa qatysyp, besinshi oryn aldym. Áskerde bolý úshin elge degen súiispenshilik kerek. Keide uiyqtaǵyń keledi, biraq Otanǵa degen mahabbat bárin eńserýge kómektesedi.
– Qandai armanyńyz bar?
– General bolǵym keledi. Saýle Aitpaeva – elimizdegi alǵashqy áiel general. Men ekinshisi bolýdy armandaimyn. Kóbi "Sen aqyldysyń, ádemisiń, saǵan sport ne kerek?" dep suraidy. Meniń jaýabym bireý qazaq qyzdary ejelden batyr, jeri men namysy úshin soǵysqan. Bul bizdiń qanymyzda bar.
– Armanyńyzǵa jetińiz, áńgimeńizge raqmet!
