Qazaqstanda aviatsiialyq kerosin óndirisi kúrt ósip, mamyr aiynda rekordtyq kórsetkishke jetti, dep habarlaidy dalanews.kz.
«Munai jáne gaz Qazaqstan» telegram-arnasynyń málimetinshe, mamyr aiynda otandyq munai óńdeý zaýyttary 96,2 myń tonna aviaotyn óndirgen. Bul ótken jyldyń osy kezeńimen salystyrǵanda aitarlyqtai joǵary. 2025 jyldyń mamyrynda óndiris kólemi 64,7 myń tonnany quraǵan.
Óndiristiń ósýine Reseiden jetkiziletin import kóleminiń kúrt qysqarýy sebep boldy. Naryq qatysýshylarynyń baǵalaýynsha, maýsymnyń alǵashqy jartysynda Reseiden Qazaqstanǵa nebári 1,9 myń tonna aviaotyn jetkizilgen. Mamyr aiynda bul kórsetkish 23,1 myń tonnany quraǵan.
Sarapshylar jetkizilimniń tómendeýin reseilik munai óńdeý zaýyttaryna jasalǵan dron shabýyldarynan keiin birqatar kásiporyndardyń jumysy buzylýymen bailanystyrady.
Osy aralyqta Belarýsten import ulǵaiǵan. Maýsymnyń alǵashqy jartysynda Belarýsten 6,58 myń tonna aviaotyn jetkizilse, mamyr aiynda bul kólem 940 tonna bolǵan.
Mamandardyń aitýynsha, maýsym aiynda Qazaqstannyń aviaotynǵa degen qajettiligi 110 myń tonnany quraidy. Al otandyq zaýyttardyń josparlanǵan óndirisi 73,4 myń tonna deńgeiinde.
Osyǵan bailanysty Atyraý munai óńdeý zaýyty aviaotyn óndirisiniń úlesin 4,05%-dan 4,51%-ǵa deiin arttyrǵan. Alaida 26 maýsymnan bastap kásiporynnyń bir bóligi josparly jóndeýge toqtaidy, bul naryqtaǵy jaǵdaidy odan ári kúrdelendirýi múmkin.
Sonymen birge Resei úkimeti qarasha aiynyń sońyna deiin aviatsiialyq kerosin eksportyna ýaqytsha shekteý engizgenimen, Qazaqstanǵa jetkiziletin otyn tolyq toqtamaidy. EAEO elderiniń indikativtik balansy aiasynda Reseiden Qazaqstanǵa 2026 jyly 300 myń tonna aviaotyndy bajsyz jetkizý jónindegi úkimetaralyq kelisim kúshinde qalyp otyr.
