Jiynda oblys ákiminiń keńesshisi Ulasbek Sádibekov Arys qalasyn qalpyna keltirý jáne jergilikti turǵyndardy áleýmettik qoldaý boiynsha tolyqqandy jumystar júrgizilip jatqandyǵyn jetkizdi.
– Qazirgi tańda jumysy sátti aiaqtalǵan Atyraý, Pavlodar, Jambyl, Mańǵystaý, Qaraǵandy, Qyzylorda sektorlarynda arnaiy sharalar ótkizildi. Onda úzdik qurylysshylar, ákimdik qyzmetkerleri, belsendiler arnaiy alǵys hattarmen marapattaldy. Sondai-aq, kúndelikti sektorlardy aralaý, narazy turǵyndarmen kezdesýler ótip, ekijaqty kelissózder júrgizilýde. Máselen, ótken aptada 16 máseleli nysan anyqtalǵan bolatyn. Tiisti jumystardy júrgizýdiń nátijesinde 1 aptanyń ishinde 6 problemalyq nysandar sheshimin tapty. Aldaǵy ýaqytta bul jumystar josparǵa sai jalǵasyn taba beredi, – dedi Ulasbek Sádibekuly.
Sondai-aq, kezdesýde Túrkistan oblysy Qurylys basqarmasynyń basshysy Erbol Ahmetov Arys qalasyndaǵy qurylys-jóndeý jumystary jaiynda baiandama jasady.
– Arys qalasynda ornalasqan 7,8,9,10 jáne 11-shi sektorlarda jalpy zaqymdalǵan 2975 úi bar. Onyń ishinde, jóndeýdi qajet etetin 2568 jeke jáne 73 kópqabatty turǵyn úiler, sonymen qatar, jańadan salynyp jatqan 334 úi. Búgingi kúnge osy sektorlarda 94 merdiger kompaniia, 180 tehnika jáne 2505 jumysshy jumyldyrylǵan. Túrkistan oblysyna tiesili 7-sektorda zaqymdalǵan 478 úi ornalasqan. Búgingi kúnge jóndeýdi qajet etetin jeke jáne kópqabatty turǵyn úilerde jumystar aiaqtaldy. Jańadan qurylysy júrgizilip jatqan 100 úidiń bárinde tiisti jumystar júrgizilýde, – dedi ol.
Sonymen qatar, Shyǵys Qazaqstan oblysyna qarasty 8-sektorda zaqymdalǵan 537 úi bar. Jóndeýdi qajet etetin 5 úidiń syrtqy jáne ishki árleý jumystary júrgizilýde. Jańadan qurylysy júrgizilip jatqan 5 úidiń bárinde tiisti jumystar atqarylýda, 20-qyrkúiekte paidalanýǵa tapsyrý josparlanǵan. Al Nur-Sultan qalasynyń 9-sektorynda 696 úi bar. Búgingi kúnge jóndeýdi qajet etetin 249 jeke jáne 31 kópqabatty úidiń syrtqy jáne ishki árleý jumystary júrgizilýde. Jańadan qurylysy júrgizilip jatqan 160 úidiń kirpishin qalaý jumystary júrgizilýde. Aǵymdaǵy jyldyń 20-qyrkúieginde sektordaǵy barlyq úilerdi paidalanýǵa tapsyrý josparlanýda.
Sondai-aq, Shymkent qalasyna tiesili 10-sektorda – 636 úi ornalasqan. Búgingi kúnge jóndeýdi qajet etetin 10 úidiń syrtqy jáne ishki árleý jumystary bar. Jańadan qurylysy júrgizilip jatqan 56 úidiń 4-i úii paidalanýǵa tapsyrylyp, qalǵan úilerde kirpish qalaý jumystary júrgizilýde. Al Batys Qazaqstan oblysyna tiesili 11-sektorda 627 úi bar. Búgingi kúnge jóndeýdi qajet etetin jeke jáne kópqabatty turǵyn úilerde jumystar aiaqtalǵan. Jańadan qurylysy júrgizilip jatqan 13 úidiń 4-i paidalanýǵa tapsyrylyp, qalǵan úilerdiń bárinde kirpish qalaý jumystary júrgizilýde. Aǵymdaǵy jyldyń 20-qyrkúieginde barlyq úilerdi paidalanýǵa tapsyrý josparlanǵan.
Jiyndy qorytqan Túrkistan oblysynyń ákimi Ómirzaq Shókeev barlyq sektor jaýaptylaryna qurylys jumystaryn ýaqytynda aiaqtaý qajettigin nyqtap tapsyrdy.
Túrkistan oblysy ákiminiń baspasóz qyzmeti
