Májilis depýtaty Ardaq Nazarov Túrkistanda araq satpaý týraly usynys jasady, - dep habarlaıdy Dalanews.kz Massaget.kz-ke siltep. 

Depýtat Túrkistan qalasy ákimdigine saýal joldady.

"Osy zań aıasynda Túrkistan - rýhanı astanamyz, Túrkistan - araqsyz qala dep Túrkistanda araq ishýge, satýǵa, araq iship, láılip kóshede júrýge tyıym salsaq?! Óıtkeni rýhanı astana dep otyrmyz, búkil qazaq osy jerden rýh alýy kerek. Ol jerde babalarymyz, áýlıe, batyr, bılerimiz jatyr. Erteń shetelden kóp qonaq keledi. Sol kezde azamattarymyz araq iship, aldynan shyǵatyn bolsa, uıat qoı. Osy zańnyń aıasynda araqsyz qala, rýhanı qala dep araqqa tyıym salýǵa bola ma?" - dedi Nazarov.

Túrkistan oblysy ákiminiń orynbasary Beısenbaı Tájibaev depýtattyń saýalyna jaýap berdi.

"Túrkistan oblysynda ishimdiksiz aýyl degen arnaıy joba jarıalanǵan. Osy jobaǵa bizdiń oblys boıynsha otyzdan asa aýyl qosylyp otyr. Bul bastama boıynsha Túrkistan qalasynda da jergilikti zıaly qaýymmen, aqsaqaldarmen, qoǵamnyń túrli belsendi ókilderimen arnaıy talqylaýlar ótkizilgen. Túrkistan negizgi basymdyq baǵytynda rýhanı-mádenı baǵytpen qatar, týrısik baǵyttaǵy qala retinde de bekitilip otyr. Soǵan sáıkes bıznes qaýymdastyqtyń ókilderi tarapynan osy máselege túrli kózqaras týyndady. Bul másele oryndy. Aldaǵy ýaqytta zań normalary aıasynda qarastyrý qajet dep sanaımyz", - dedi ol.

Kelesi jyly Túrkistan qalasyna erekshe mártebe beriledi. Búgin Májilis depýtattary Túrkistan qalasyna erekshe mártebe berý týraly zań jobasyn aıaqtap, birinshi oqylymǵa usynýǵa daıyn.

Bul qujat Túrkistandy Qazaqstannyń rýhanı-mádenı, tarıhı jáne týrısik ortalyǵy retinde damytýǵa baǵyttalǵan.