Aqtóbe oblysynyń Baiǵanin aýdanynda qatty jel saldarynan jergilikti deńgeidegi tabiǵi sipattaǵy tótenshe jaǵdai jariialandy, dep habarlaidy dalanews.kz.
Oblys ákimdigi málimetinshe, qatty jel aýdan ortalyǵyndaǵy jeke turǵan bir qabatty dúkenniń shatyryna temir bailanys munarasy qulaýyna sebep bolǵan. Oqiǵa saldarynan úsh adam zardap shegip, aýdandyq aýrýhanada meditsinalyq kómek alǵan.
Qolaisyz aýa raiynan óńirdegi basqa da nysandarǵa zaqym kelgen.
Jaǵdaidy zerdeleý nátijesinde Baiǵanin aýdanynda jergilikti deńgeidegi tabiǵi sipattaǵy tótenshe jaǵdai rejimin engizý týraly sheshim qabyldanǵan.
Oblys ákimi Ashat Shaharovtyń tapsyrmasymen aýdanǵa oblys ákiminiń orynbasary Ǵalymjan Eleýov baryp, búlingen nysandy qarap, elektr jelilerin qalpyna keltirý jumystarynyń barysymen tanysty.
"Energojúie" JShS málimetinshe, kún kúrt buzylýyna bailanysty jedel shtab qurylǵan. Qaraýylkeldi aýylynda elektrmen jabdyqtaýdy qalpyna keltirý jumystary jalǵasyp jatyr.
Barlyq jaýapty qyzmet kúsheitilgen jumys tártibine kóshirilgen.
Oblys ákiminiń orynbasary jaǵdai Ashat Shaharovtyń jeke baqylaýynda ekenin aitty. Onyń sózinshe, aýdanǵa arnaiy komissiia jiberilgen, al zardap shekkenderge zańnamaǵa sáikes qajet kómek kórsetiledi.
