Aqtaýda ushaq apaty bolǵan jerdi sýretke túsirgen bloger Azamat Sársenbaev qamaýǵa alyndy, - dep habarlaidy Dalanews.kz.
Bul týraly blogerdiń advokaty Aibek Súiindikov habarlady.
"Mańǵystaý oblysy Túpqaraǵan aýdandyq sotynyń úkimimen Azamat Sársenbaev Ákimshilik quqyq buzýshylyq jasaǵany, iaǵni quqyq qorǵaý organynyń qyzmettik mindetterin oryndaýyna bailanysty onyń zańdy talabyna baǵynbaǵany úshin kináli dep tanyldy. Sot tarapynan 10 táýlikke ákimshilik qamaýǵa alý túrindegi jaza taǵaiyndaldy. Istiń mán-jaiyn eskere otyryp, sot QR ÁQBtK-niń 667-babynyń 1-bóliginiń sanktsiiasy sheginde, onda ákimshilik qamaýdyń eń uzaq merzimi 15 táýlik dep belgilengen, jaza qoldandy", deidi advokat.
Sottyń qaýlysy zańdy kúshine engen joq.
Eske salaiyq, 25 jeltoqsanda Aqtaýda ushaq apatqa ushyraǵan jerdi túsirgen bloger ustalǵany belgili boldy.
Bloger bul týraly Instagram paraqshasynda jazdy.
"Meni ustady. Aqtaý qalalyq politsiia basqarmasyna bara jatyrmyn. Ushaq apatqa ushyraǵan jerdi túsirgenim úshin ustaǵan bolýy múmkin", - dedi ol.
Mańǵystaý oblysynyń PD málimetinshe, Sársenbaev qoǵamdyq tártipti buzǵany úshin ustalǵan.
"Ol oqiǵa ornynda dron ushyryp, qutqarý jáne tergeý jumystaryna kedergi keltirdi jáne politsiia qyzmetkerleriniń zańdy talaptaryna baǵynbady. Qazir quqyqbuzýshy politsiia basqarmasyna jetkizildi, oǵan qatysty qoldanystaǵy zańnamaǵa sáikes sharalar qabyldanady", - dedi politsiia.
Aita keteiik, buǵan deiin bloger dron kómegimen Aqtaýdaǵy jolaýshylar ushaǵy apatqa ushyraǵan jerdi sýretke túsirip, jariialaǵan bolatyn.
