Qazaqstannyń Kólik ministrligi Aqtaýdaǵy ushaq apatyn tergeýge qatysty málimdeme jasady, dep habarlaidy Dalanews.kz.
Chikago konventsiiasynyń 13-qosymshasyna sáikes, apat oryn alǵan el ushaqtyń qara jáshigin zerttep, derekterin oqýdy qamtamasyz etýge mindetti. Sonymen birge bul derekterdi qai elde taldaitynyn da ózi sheshedi.
Qazaqstan bul konventsiiaǵa 1992 jyly qosylyp, Halyqaralyq azamattyq aviatsiia uiymynyń (IKAO) tolyqqandy múshesi atanǵan. Osy talaptarǵa súiene otyryp, sondai-aq Ázerbaijan men Reseidiń aviatsiialyq organdarymen aqyldasqan soń, QR Kólik ministri Marat Qarabaev basqaratyn komissiia Embraer ushaǵynyń qara jáshigin Braziliiadaǵy CENIPA ortalyǵyna jiberý týraly sheshim qabyldady.
CENIPA – aviatsiialyq oqiǵalardy zertteýge arnalǵan halyqaralyq deńgeidegi mamandandyrylǵan ortalyq. Onda derekterdi oqýǵa qajetti qural-jabdyqtar men sertifikattalǵan zerthana bar.
Ministrliktiń aitýynsha, bul másele Memleket basshysynyń tikelei baqylaýynda.
Aita keteiik, buǵan deiin Kólik vitse-ministri Talǵat Lastaev apatqa ushyraǵan ushaqtan tabylǵan qara jáshiktiń qashan ashylatyny jaily málimdeme jasaǵan edi.
Lastaevtyń aitýynsha, ony ashýdyń naqty qadamy bar.
"Eń aldymen, áýe apatyn zertteý boiynsha arnaiy komissiia qurylady. Sol komissiia oqiǵanyń mán-jaiyn zerttep, barlyq aqparatty taldai otyryp, qara jáshikti ashý boiynsha sheshim qabyldaidy. Qazirgi ýaqytta bul protsess júrip jatyr – ushaqtyń fragmentteri men bólshekteri jinalýda. Erteń oqiǵa ornyna sarapshylar barady. Ushaqtyń shyqqan eli – Braziliia,” – dep atap ótti Talǵat Lastaev.
Onyń sózinshe, Qazaqstanǵa áýe tasymaldaýshy kompaniianyń ókilderi de kelmek. Barlyq tarap jinalǵannan keiin, qara jáshiktiń qashan ashylatyny belgili bolady.
Eske salaiyq, 25 jeltoqsanda Aqtaý mańynda ushaq qulady. Osyǵan bailanysty TJM túsinikteme berdi.
"Aqtaýda ushaq qulaǵan orynǵa Qazaqstan TJM jeke quramynan 52 adam jáne 11 birlik tehnikasy bardy. Oqiǵa ornyna kelgen boida áýe kemesi janyp jatty. Qutqarý bólimsheleri órtti sóndirýge kiristi", - dedi olar.
