QR Prezıdentiniń tapsyrmasy boıynsha Aqtaýdaǵy bıtým zaýytynda «Caspi Bitum» BK» JSHS-da («QazMunaıGaz» UK AQ enshiles kásiporny) iske asyrylyp jatqan jańǵyrtý jobasy aıasynda mańyzdy nátıjege qol jetkizildi. Jańartylǵan qýattardyń jumysqa daıyndyǵyn rastaıtyn 740 tonna jol bıtýmynyń birinshi partıasyna sapa pasporty alyndy,– dep habarlaıdy Dalanews.kz
Jańǵyrtý jobasy munaı óńdeý qýatyn jylyna 1,5 mln tonnaǵa deıin arttyrý maqsatynda jańa negizgi tehnologıalyq jabdyqty aýystyrý men ornatýdy qamtıtyn — ELOÝ-AVT munaıdy bastapqy óńdeý qondyrǵysyn jańartýǵa baǵyttalǵan.
Mańyzdy kezeńderdiń biri — naýryz aıynda bıiktigi 40 metr jáne salmaǵy 140 tonna bolatyn jańa T-1102 vakýmdy baǵanany kúrdeli montajdaý jumystary boldy. Bul jabdyq mazýt óńdeýdi ulǵaıtýǵa jáne jańa sý saqınaly vakým jasaý júıesin qosa alǵanda ozyq tehnologıalardy paıdalana otyryp, jol bıtýmyn óndirý úshin negizgi shıkizat bolyp tabylatyn joǵary sapaly gýdron alýǵa múmkindik beredi. Vakýmdy baǵanamen qatar qondyrǵynyń atmosferalyq bóligi, tehnologıalyq peshter, jylý almasý jáne sorǵy jabdyqtary modernızasıadan ótti, sonymen birge avtomattandyrý jáne baqylaý júıeleri de jańartyldy.
2024 jyldyń qarasha aıynda bastalǵan qurylys-montajdaý jumystaryn bas merdiger CITIC Construction júrgizdi. Jumysty tıimdi uıymdastyrý nátıjesinde, sonyń ishinde 220-dan astam adamdy tarta otyryp, táýlik boıy jumys isteý rejıminde joba kesteden bir aı buryn aıaqtaldy. Kúrdeli ınvestısıalar kólemi $76 mıllıon qurady. Caspi Bitum zaýytynyń resmı iske qosylýy jáne jobalyq qýatqa shyǵýy 2025 jylǵy mamyr aıynyń basyna josparlanǵan.
Bul jobanyń Qazaqstan úshin strategıalyq mańyzy zor. Bıtým óndirisin jylyna 500-den 750 myń tonnaǵa deıin ulǵaıtý búkil el boıynsha belsendi jol qurylysynyń qajettilikterin qamtamasyz etedi.
