Májiliste «Qazaqstan Respýblikasynyń keibir zańnamalyq aktilerine mashina jasaýdy damytý máseleleri boiynsha ózgerister men tolyqtyrýlar engizý týraly» zań jobasy birinshi oqylymda qaraýǵa usynyldy, dep habarlaidy dalanews.kz.
Ekonomikalyq reforma jáne óńirlik damý komitetiniń qorytyndysyna sáikes, qujat mashina jasaý salasyn damytýǵa, arnaiy ekonomikalyq aimaqtardyń jumysyn qaita qaraýǵa jáne óndiris salasyndaǵy baqylaýdy kúsheitýge baǵyttalǵan.
Zań jobasy aiasynda memlekettik qoldaýǵa ie bolatyn ónerkásiptik klasterler institýtyn engizý kózdelip otyr. Sonymen qatar arnaiy ekonomikalyq aimaqtar qyzmetine qatysy joq beiindi emes baǵyttardy alyp tastaý usynylǵan.
Qujatta arnaiy ekonomikalyq aimaqtarǵa qatysýshylar úshin jańa talaptar engiziledi. Sondai aq óńdeý ónerkásibindegi jobalardy iske asyrý kezinde óndiristik alań úlesiniń eń tómengi shegi belgilenedi.
Májilis qaraýyna engizilgen túzetýlerdiń biri arnaiy ekonomikalyq aimaqtardyń qyzmet merzimin uzartýǵa qatysty. Bul múmkindik qatysýshylar ekonomikalyq qyzmettiń basym baǵyttaryn saqtaǵan jaǵdaida qarastyrylmaq.
Sonymen birge resýrstardyń maqsatsyz paidalanylýyn boldyrmaý úshin qatysýshylardyń sharttyq mindettemelerine baqylaý kúsheitiledi.
Zań jobasynda arnaiy investitsiialyq jobalardy júzege asyratyn qazaqstandyq kompaniialarǵa da jeńildikter usynylǵan. Atap aitqanda, qarjylyq lizing negizinde ákelinetin tehnologiialyq jabdyqtarǵa kedendik bajdan bosatý engiziledi.
Qujatta memlekettik investitsiialar jáne kvazimemlekettik sektor qarjysy esebinen salynatyn nysandarda otandyq qurylys materialdary men jabdyqtaryn paidalaný talaptaryna monitoring júrgizetin komissiialar qurý usynylǵan.
Sondai aq Biryńǵai indýstriialandyrý kartasy jobalarynyń tizilimi ázirlenip, júrgizilmek.
Budan bólek zań jobasy tústi jáne qara metaldardyń synyqtary men qaldyqtaryn jinaý, saqtaý, qaita óńdeý jáne ótkizýdi retteýge baǵyttalǵan normalardy qamtidy.
Májilistiń barlyq komitetteri qujat boiynsha qorytyndy bergen. Jumys tobyna jalpy sany 204 túzetý túsken. Olar alty jumys tobynyń otyrysynda jáne komitettiń keńeitilgen jiynynda ministrlikter, vedomstvolar, qoǵamdyq uiymdar men sarapshylardyń qatysýymen talqylanǵan.
Ekonomikalyq reforma jáne óńirlik damý komiteti zań jobasyn birinshi oqylymda Májilistiń jalpy otyrysyna engizýdi usyndy. Qujat aldaǵy ýaqytta depýtattar talqylaýyna shyǵarylady.
