Áleýmettik jelilerde Astanadaǵy qoǵamdyq tamaqtaný oryndarynda it eti satylyp jatqany týraly aqparat qaita tarala bastady. Osyǵan bailanysty elordanyń veterinariialyq qyzmeti resmi túsinikteme berdi, dep habarlaidy dalanews.kz.
Astana Vetservice málimetinshe, taralyp jatqan aqparat qazirgi jaǵdaiǵa emes, 2023 jyly Aqmola oblysynda anyqtalǵan janýar tektes ónimderdiń zańsyz ainalymyna qatysty oqiǵaǵa bailanysty.
Vedomstvonyń habarlaýynsha, sol fakti boiynsha quqyq qorǵaý organdary tergeý júrgizip, is materialdary sotta qaralǵan. Kináli tulǵa qoldanystaǵy zańnamaǵa sáikes jaýapkershilikke tartylǵan.
Sonymen qatar veterinariialyq qyzmet qazirgi ýaqytta Astana qalasyndaǵy qoǵamdyq tamaqtaný oryndarynda mundai ónimderdi jetkizý, satý nemese paidalaný faktileri resmi túrde tirkelmegenin málimdedi.
Mekeme dereginshe, elordada janýar tektes ónimderge turaqty veterinariialyq sanitariialyq baqylaý júrgiziledi. Onyń aiasynda ilespe qujattar tekserilip, jetkizýshilerge monitoring jasalady jáne azyq túlik qaýipsizdigi talaptarynyń saqtalýy qadaǵalanady.
Sondai aq vedomstvo búginde et ónimderiniń zańsyz ainalymyna nemese qoǵamdyq tamaqtaný oryndaryndaǵy qyzmetke qatysty zańbuzýshylyqtar anyqtalmaǵanyn atap ótti.
Veterinariialyq qyzmet ókilderi turǵyndardy tek resmi aqparatqa senýge jáne rastalmaǵan málimetterdi taratpaýǵa shaqyrdy.
