ق ر پرەزيدەنتىنىڭ تاپسىرماسى بويىنشا اقتاۋداعى بيتۋم زاۋىتىندا «Caspi Bitum» بك» جشس-دا («قازمۇنايگاز» ۇك اق ەنشىلەس كاسىپورنى) ىسكە اسىرىلىپ جاتقان جاڭعىرتۋ جوباسى اياسىندا ماڭىزدى ناتيجەگە قول جەتكىزىلدى. جاڭارتىلعان قۋاتتاردىڭ جۇمىسقا دايىندىعىن راستايتىن 740 توننا جول بيتۋمىنىڭ ءبىرىنشى پارتياسىنا ساپا پاسپورتى الىندى،– دەپ حابارلايدى Dalanews.kz
جاڭعىرتۋ جوباسى مۇناي وڭدەۋ قۋاتىن جىلىنا 1،5 ملن تونناعا دەيىن ارتتىرۋ ماقساتىندا جاڭا نەگىزگى تەحنولوگيالىق جابدىقتى اۋىستىرۋ مەن ورناتۋدى قامتيتىن — ەلوۋ-اۆت مۇنايدى باستاپقى وڭدەۋ قوندىرعىسىن جاڭارتۋعا باعىتتالعان.
ماڭىزدى كەزەڭدەردىڭ ءبىرى — ناۋرىز ايىندا بيىكتىگى 40 مەتر جانە سالماعى 140 توننا بولاتىن جاڭا ت-1102 ۆاكۋۋمدى باعانانى كۇردەلى مونتاجداۋ جۇمىستارى بولدى. بۇل جابدىق مازۋت وڭدەۋدى ۇلعايتۋعا جانە جاڭا سۋ ساقينالى ۆاكۋۋم جاساۋ جۇيەسىن قوسا العاندا وزىق تەحنولوگيالاردى پايدالانا وتىرىپ، جول بيتۋمىن ءوندىرۋ ءۇشىن نەگىزگى شيكىزات بولىپ تابىلاتىن جوعارى ساپالى گۋدرون الۋعا مۇمكىندىك بەرەدى. ۆاكۋۋمدى باعانامەن قاتار قوندىرعىنىڭ اتموسفەرالىق بولىگى، تەحنولوگيالىق پەشتەر، جىلۋ الماسۋ جانە سورعى جابدىقتارى مودەرنيزاسيادان ءوتتى، سونىمەن بىرگە اۆتوماتتاندىرۋ جانە باقىلاۋ جۇيەلەرى دە جاڭارتىلدى.
2024 جىلدىڭ قاراشا ايىندا باستالعان قۇرىلىس-مونتاجداۋ جۇمىستارىن باس مەردىگەر CITIC Construction جۇرگىزدى. جۇمىستى ءتيىمدى ۇيىمداستىرۋ ناتيجەسىندە، سونىڭ ىشىندە 220-دان استام ادامدى تارتا وتىرىپ، تاۋلىك بويى جۇمىس ىستەۋ رەجيمىندە جوبا كەستەدەن ءبىر اي بۇرىن اياقتالدى. كۇردەلى ينۆەستيسيالار كولەمى $76 ميلليون قۇرادى. Caspi Bitum زاۋىتىنىڭ رەسمي ىسكە قوسىلۋى جانە جوبالىق قۋاتقا شىعۋى 2025 جىلعى مامىر ايىنىڭ باسىنا جوسپارلانعان.
بۇل جوبانىڭ قازاقستان ءۇشىن ستراتەگيالىق ماڭىزى زور. بيتۋم ءوندىرىسىن جىلىنا 500-دەن 750 مىڭ تونناعا دەيىن ۇلعايتۋ بۇكىل ەل بويىنشا بەلسەندى جول قۇرىلىسىنىڭ قاجەتتىلىكتەرىن قامتاماسىز ەتەدى.
