الماتى دا LRT جەلٸسٸن سالۋعا قامدانىپ جاتىر. ٶڭٸرلٸك كوممۋنيكاتسييالار قىزمەتٸندە ٶتكەن باسپاسٶز مەسليحاتىندا جولاۋشىلار كٶلٸگٸ مەن جول قوزعالىسىن ۇيىمداستىرۋ باسقارماسىنىڭ باسشىسى ەرجان ديحانباەۆ الداعى جوسپاردى ايتتى, دەپ حابارلايدى dalanews.kz.
باسپاسٶز مەسليحاتىندا LRT-نىڭ العاشقى جەلٸسٸنٸڭ قۇرىلىسىنا دايىندىق بارىسى ايتىلدى. جوبانىڭ تەحنيكالىق-ەكونوميكالىق نەگٸزدەمەسٸ اياقتالىپ, مەملەكەتتٸك ساراپتامادان ٶتٸپ جاتىر. قورىتىندى 2026 جىلى شٸلدەدە شىقپاق.
ۇزىندىعى 18,3 شاقىرىم بولاتىن العاشقى LRT جەلٸسٸ تٶلە بي كٶشەسٸمەن ٶتٸپ, ەرٸ قاراي ابىلاي حان داڭعىلى ارقىلى الماتى-2 ۆوكزالىنا دەيٸن, سونداي-اق, مومىشۇلى كٶشەسٸ ارقىلى الاتاۋ اۋدانىنداعى يندۋسترييالىق ايماققا دەيٸن بارادى.
"LRT قۇرىلىسىنىڭ بەلسەندٸ كەزەڭٸ مەملەكەتتٸك ساراپتامانىڭ وڭ قورىتىندىسى الىنعاننان كەيٸن باستالادى. جوبا جەلٸنٸڭ ٶزٸن عانا ەمەس, دەپو قۇرىلىسىن دا قامتيدى. LRT-نى الماتىنىڭ جاڭا كٶلٸك جٷيەسٸنٸڭ نەگٸزگٸ ەلەمەنتٸنٸڭ بٸرٸ رەتٸندە قاراستىرامىز", — دەدٸ ەرجان ديحانباەۆ.
