Májiliste «Qazaqstan Respýblikasynyń keibir zańnamalyq aktilerine notariattyq qyzmet máseleleri boiynsha ózgerister men tolyqtyrýlar engizý týraly» zań jobasy tanystyryldy, dep habarlaidy dalanews.kz.
Zań jobasyn depýtattar toby ázirlegen. Qujat aiasynda Kásipkerlik kodeksine, Azamattyq protsestik kodekske jáne «Notariat týraly» zańǵa ózgerister engizý kózdelip otyr.
Májilis otyrysynda baiandama jasaǵan depýtat Nursultan Baitilesovtiń aitýynsha, túzetýler azamattardyń quqyqtaryn qorǵaýdy kúsheitýge, atqarýshylyq jazbalar júiesin jetildirýge, memlekettik baqylaýdy arttyrýǵa jáne notariat salasyn tsifrlandyrýǵa baǵyttalǵan.
Qujattaǵy basty ózgeristerdiń biri notariattyq qyzmetterdi onlain formatqa kóshirýge qatysty. Qazirdiń ózinde senimhattar men kelisimderdiń bir bóligi qashyqtan rásimdelip jatyr. Pilottyq joba aiasynda 800 myńnan astam qyzmet onlain kórsetilgen.
Depýtattardyń málimetinshe, endi bul tetikterdi zań deńgeiinde bekitý usynylyp otyr. Sonyń arqasynda notariattyq áreketter azamattyń jeke qatysýymen ǵana emes, elektrondyq úkimet portaly arqyly da júrgizilýi múmkin.
Zań jobasynda atqarýshylyq jazbalarǵa qatysty talaptar da qatańdatylady. Qazir keibir mikroqarjy uiymdary kelisimsharttarǵa kez kelgen notariýsqa júginýge múmkindik beretin normalar engizip keledi. Bul tájiribe quqyq qoldanýda árkelkilik týdyryp otyr.
Osyǵan bailanysty atqarýshylyq jazbany tek boryshkerdiń tirkelgen jeri boiynsha rásimdeý usynylǵan. Eger boryshkerdiń turatyn aýmaǵy sáikes kelmese, júie avtomatty túrde buǵat qoiady.
Taǵy bir mańyzdy ózgeris boryshkerlerdi habardar etýge qatysty.
Búginde kóptegen azamat atqarýshylyq jazba jasalǵanyn tek bank shottary buǵattalǵannan keiin ǵana biledi. Jańa túzetýler boiynsha boryshkerge atqarýshylyq jazbanyń kóshirmesi elektrondyq úkimet portaly jáne SMS arqyly jiberiledi.
Májilis otyrysynda pilottyq joba kezinde mundai júieniń tiimdiligi dáleldengeni aityldy.
Sonymen qatar zań jobasynda notariýstardyń jeke sot oryndaýshylarymen, mikroqarjy uiymdarymen jáne ózge de múddeli tulǵalarmen bailanysyn shekteý usynylǵan.
Atap aitqanda, jaqyn týystyq nemese ózge táýeldilik anyqtalǵan jaǵdaida notariattyq áreketter jasaýǵa tyiym salý qarastyrylyp otyr.
Budan bólek memlekettik jáne kvazimemlekettik sektor kelisimsharttaryna qatysty atqarýshylyq jazbalardy notariýstar quzyretinen alyp tastaý usynylǵan. Mundai daýlar sot tártibimen qaralýy múmkin.
Sondai aq qujat aiasynda notariýstardyń «Notariat týraly» zań talaptaryn jáne derbes derekterdi qorǵaý erejelerin buzǵany úshin jaýapkershilikti kúsheitý kózdelgen.
Májilis depýtattarynyń pikirinshe, túzetýler qabyldansa, notariat salasyndaǵy ashyqtyq artyp, azamattardyń quqyqtaryn qorǵaý tetikteri kúsheiedi, al atqarýshylyq jazbalardy teris paidalaný táýekeli tómendeidi.
