Kólik vıse-mınıstri Talǵat Lastaev apatqa ushyraǵan ushaqtan tabylǵan qara jáshiktiń qashan ashylatyny jaıly málimdeme jasady, dep habarlaıdy Dalanews.kz. 

Lastaevtyń aıtýynsha, ony ashýdyń naqty qadamy bar.

"Eń aldymen, áýe apatyn zertteý boıynsha arnaıy komısıa qurylady. Sol komısıa oqıǵanyń mán-jaıyn zerttep, barlyq aqparatty taldaı otyryp, qara jáshikti ashý boıynsha sheshim qabyldaıdy. Qazirgi ýaqytta bul proses júrip jatyr – ushaqtyń fragmentteri men bólshekteri jınalýda. Erteń oqıǵa ornyna sarapshylar barady. Ushaqtyń shyqqan eli – Brazılıa,” – dep atap ótti Talǵat Lastaev.

Onyń sózinshe, Qazaqstanǵa áýe tasymaldaýshy kompanıanyń ókilderi de kelmek. Barlyq tarap jınalǵannan keıin, qara jáshiktiń qashan ashylatyny belgili bolady. 

Eske salaıyq, 25 jeltoqsanda Aqtaý mańynda ushaq qulady. Osyǵan baılanysty TJM túsinikteme berdi. 

"Aqtaýda ushaq qulaǵan orynǵa Qazaqstan TJM jeke quramynan 52 adam jáne 11 birlik tehnıkasy bardy. Oqıǵa ornyna kelgen boıda áýe kemesi janyp jatty. Qutqarý bólimsheleri órtti sóndirýge kiristi", - dedi olar. 

"Qazaeronavıgasıa" aqparatynsha, Baký-Groznyı baǵyty boıynsha kele jatqan "Embraır190" AHY8243 ushaǵy Aqtaýda quspen soqtyǵysqan. 

Al ázerbaıjandyq BAQ-tyń habarlaýynsha, bortta 67 adam men 5 ekıpaj múshesi bolǵan.