Aqtaýda 7-synypta oqityn oqýshy qyz joǵary synyp oqýshylary tarapynan birneshe ret zorlyqqa ushyrap, bolǵan jaǵdaidy jasyryp kelgen. Bul shýly aqparatqa politsiia pikir bildirdi, dep habarlaidy Dalanews.kz.
Kámeletke tolmaǵan balaǵa qatysty zorlyq derekteri Nemolchi.kz qorynyń paraqshasynda jariialandy. Qor usynǵan málimetke sáikes, qyz ótken jyldyń qyrkúiek aiynan bastap zorlyqqa ushyraǵan.
«7-synyp oqityn qyzdy sabaqtan keiin ustap alyp, qurylys alańyna súirep aparǵan. Sol jerde ony mazaqtap, qorlap, barlyǵyn telefonǵa túsirgen. Birneshe bala top bolyp, azǵyn tásilmen zorlyq jasaǵan: intim jerlerine temeki tyǵyp, ishine sekirgen, uryp-soqqan», – delingen jariialanymda.
Sondai-aq, jábirleýshiler keńse pyshaǵymen qyzdyń denesine qorlaityn sózder oiyp jazǵany aitylǵan.
«Zorlyq birneshe ret qaitalanǵan. Qyz áldekimge aitýǵa qorqyp, uzaq ýaqyt boiy anasyn aldap kelgen. Aqyry aýyr depressiiaǵa túsken», – dep jazady qor.
Qor málimetinshe, qazirgi tańda jasóspirimniń psihologiialyq jaǵdaiy óte aýyr. Ol jaryqsyz uiyqtai almaidy, birneshe ret psihiatriialyq klinikada em alǵan jáne sýitsidke birneshe márte áreket jasaǵan.
Qor málimetinshe, qazirgi ýaqytta kúdiktilerdiń eshqaisysy ustalyp, jaýapqa tartylmaǵan, olardyń barlyǵy bostandyqta júrgen kórinedi.
Mańǵystaý oblysynyń politsiia departamenti bul derek boiynsha Qylmystyq kodekstiń 120-babynyń 4-bóligi («Kámeletke tolmaǵandy zorlaý») boiynsha qylmystyq is qozǵalǵanyn habarlady.
