اقتاۋدا 7-سىنىپتا وقيتىن وقۋشى قىز جوعارى سىنىپ وقۋشىلارى تاراپىنان بىرنەشە رەت زورلىققا ۇشىراپ، بولعان جاعدايدى جاسىرىپ كەلگەن. بۇل شۋلى اقپاراتقا پوليسيا پىكىر ءبىلدىردى، دەپ حابارلايدى Dalanews.kz.

كامەلەتكە تولماعان بالاعا قاتىستى زورلىق دەرەكتەرى نەمولچي.kz قورىنىڭ پاراقشاسىندا جاريالاندى. قور ۇسىنعان مالىمەتكە سايكەس، قىز وتكەن جىلدىڭ قىركۇيەك ايىنان باستاپ زورلىققا ۇشىراعان.

«7-سىنىپ وقيتىن قىزدى ساباقتان كەيىن ۇستاپ الىپ، قۇرىلىس الاڭىنا سۇيرەپ اپارعان. سول جەردە ونى مازاقتاپ، قورلاپ، بارلىعىن تەلەفونعا تۇسىرگەن. بىرنەشە بالا توپ بولىپ، ازعىن تاسىلمەن زورلىق جاساعان: ينتيم جەرلەرىنە تەمەكى تىعىپ، ىشىنە سەكىرگەن، ۇرىپ-سوققان»، – دەلىنگەن جاريالانىمدا.

سونداي-اق، جابىرلەۋشىلەر كەڭسە پىشاعىمەن قىزدىڭ دەنەسىنە قورلايتىن سوزدەر ويىپ جازعانى ايتىلعان.

«زورلىق بىرنەشە رەت قايتالانعان. قىز الدەكىمگە ايتۋعا قورقىپ، ۇزاق ۋاقىت بويى اناسىن الداپ كەلگەن. اقىرى اۋىر دەپرەسسياعا تۇسكەن»، – دەپ جازادى قور.

قور مالىمەتىنشە، قازىرگى تاڭدا ءجاسوسپىرىمنىڭ پسيحولوگيالىق جاعدايى وتە اۋىر. ول جارىقسىز ۇيىقتاي المايدى، بىرنەشە رەت پسيحياتريالىق كلينيكادا ەم العان جانە سۋيسيدكە بىرنەشە مارتە ارەكەت جاساعان.

قور مالىمەتىنشە، قازىرگى ۋاقىتتا كۇدىكتىلەردىڭ ەشقايسىسى ۇستالىپ، جاۋاپقا تارتىلماعان، ولاردىڭ بارلىعى بوستاندىقتا جۇرگەن كورىنەدى.

ماڭعىستاۋ وبلىسىنىڭ پوليسيا دەپارتامەنتى بۇل دەرەك بويىنشا قىلمىستىق كودەكستىڭ 120-بابىنىڭ 4-بولىگى («كامەلەتكە تولماعاندى زورلاۋ») بويىنشا قىلمىستىق ءىس قوزعالعانىن حابارلادى.