AQSH-tyń alty shtatynda saılaý ýchaskeleri jabyldy, - dep habarlaıdy Dalanews.kz.
Shyǵys ýaqyty boıynsha caǵat 19:00-de (Astana ýaqyty boıynsha 05:00) Djordjıa, Indıana, Kentýkkı, Ońtústik Karolına, Vermont jáne Vırdjınıadaǵy saılaý ýchaskeleri jabyldy.
Saǵat 19:30-da Soltústik Karolına, Ogaıo jáne Batys Vırdjınıadaǵy saılaý ýchaskeleri jabyldy.
Gavaıı men Aláskadaǵy saılaý ýchaskelerinde daýys berý Astana ýaqyty boıynsha saǵat 10:00-de aıaqtalady.
Birinshi jalpyulttyq ekzıtpol málimetterine sáıkes búkil eldegi saılaýshylardyń 44 paıyzy Trampqa oń kózqaraspen qaraıtynyn aıtqan, al Harrısti 48 paıyzdy qoldady.
Nevada men Pensılvanıadaǵy ekzıtpol nátıjeleri Tramptyń jeńisin kórsetedi, bul shtattarda oǵan 47 paıyz daýys bergen.
Harrıs Soltústik Karolınada, Vıskonsınde jeńiske jetti, munda 47 paıyz daýys jınady, al Djordjıada 49 paıyz daýysqa jáne Mıchıganda saılaýshylardyń 48 paıyzynyń qoldaýyna ıe boldy.
Arızonada eki úmitker de 46 paıyz jınady.
"Amerıka daýysy" portalynyń málimetteri boıynsha Tramp saılaýshylar alqasynan 210 daýys, Harrıs 112 daýys alǵan. Al New York Times basylymy Tramp 298 daýysqa, al Harrıs 240 daýysqa ıe bolady dep boljaıdy.
Aıta keteıik, buǵan deıin L.N. Gýmılev atyndaǵy Eýrazıa ulttyq ýnıversıteti Saıasattaný kafedrasynyń meńgerýshisi m.a. Janat Momynqulov Dalanews.kz-ke suhbat berip, saılaý nátıjeleri týraly boljam jasady.
"Tramp álemdik saıasatta oıyp turyp oryn alady. Onyń ústine qazirgideı daǵdarys, soǵys jaǵdaıynda onyń is-qımyly - bári óte mańyzdy. Biraq Harrıs qalǵan jaǵdaıda Amerıkanyń osy saıasaty jalǵasa beredi. Qytaıǵa, Reseıge, Iranǵa qatysty shekteý, tejeý saıasaty júredi.
Meniń oıymsha, Harrıstiń jeńisine qýanamyz. Al Tramp keletin bolsa, Reseımen qarym-qatynasyndaǵy ózgerister Ortalyq Azıaǵa, bizge salqyn áser etedi. Bári aınalyp kelgende halyqaralyq júıege áser etedi. Biz boljap bolmaıtyn oqıǵalar bastalyp ketýi múmkin. Harrıs Ortalyq Azıaǵa jańa bir kózqaras tanytýy múmkin, ol - Aq úıdiń mańyndaǵy búrokrattardyń ókili, turaqtylyqtyń "garantıasy". Al Tramp kelse, Ýkraınadaǵy jaǵdaı uzaqqa sozylatyn daýǵa aınalýy múmkin. Sondyqtan, meniń oıymsha, Harrıstiń kelgeni Qazaqstanǵa tıimdi. Ortalyq Azıaǵa tikeleı áseri bolmasa da, sheshimderi arqyly aınalyp kelgende áseri bolady", - dedi ol.
