اقش-تىڭ التى شتاتىندا سايلاۋ ۋچاسكەلەرى جابىلدى، - دەپ حابارلايدى Dalanews.kz.
شىعىس ۋاقىتى بويىنشا cاعات 19:00-دە (استانا ۋاقىتى بويىنشا 05:00) دجوردجيا، ينديانا، كەنتۋككي، وڭتۇستىك كارولينا، ۆەرمونت جانە ۆيردجينياداعى سايلاۋ ۋچاسكەلەرى جابىلدى.
ساعات 19:30-دا سولتۇستىك كارولينا، وگايو جانە باتىس ۆيردجينياداعى سايلاۋ ۋچاسكەلەرى جابىلدى.
گاۆايي مەن الياسكاداعى سايلاۋ ۋچاسكەلەرىندە داۋىس بەرۋ استانا ۋاقىتى بويىنشا ساعات 10:00-دە اياقتالادى.
ءبىرىنشى جالپىۇلتتىق ەكزيتپول مالىمەتتەرىنە سايكەس بۇكىل ەلدەگى سايلاۋشىلاردىڭ 44 پايىزى ترامپقا وڭ كوزقاراسپەن قارايتىنىن ايتقان، ال ءحارريستى 48 پايىزدى قولدادى.
نيەۆادا مەن پەنسيلۆانياداعى ەكزيتپول ناتيجەلەرى ترامپتىڭ جەڭىسىن كورسەتەدى، بۇل شتاتتاردا وعان 47 پايىز داۋىس بەرگەن.
حارريس سولتۇستىك كارولينادا، ۆيسكونسيندە جەڭىسكە جەتتى، مۇندا 47 پايىز داۋىس جينادى، ال دجوردجيادا 49 پايىز داۋىسقا جانە ميچيگاندا سايلاۋشىلاردىڭ 48 پايىزىنىڭ قولداۋىنا يە بولدى.
اريزونادا ەكى ۇمىتكەر دە 46 پايىز جينادى.
"امەريكا داۋىسى" پورتالىنىڭ مالىمەتتەرى بويىنشا ترامپ سايلاۋشىلار القاسىنان 210 داۋىس، حارريس 112 داۋىس العان. ال New York Times باسىلىمى ترامپ 298 داۋىسقا، ال حارريس 240 داۋىسقا يە بولادى دەپ بولجايدى.
ايتا كەتەيىك، بۇعان دەيىن ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ مەڭگەرۋشىسى م.ا. جانات مومىنقۇلوۆ Dalanews.kz-كە سۇحبات بەرىپ، سايلاۋ ناتيجەلەرى تۋرالى بولجام جاسادى.
"ترامپ الەمدىك ساياساتتا ويىپ تۇرىپ ورىن الادى. ونىڭ ۇستىنە قازىرگىدەي داعدارىس، سوعىس جاعدايىندا ونىڭ ءىس-قيمىلى - ءبارى وتە ماڭىزدى. ءبىراق حارريس قالعان جاعدايدا امەريكانىڭ وسى ساياساتى جالعاسا بەرەدى. قىتايعا، رەسەيگە، يرانعا قاتىستى شەكتەۋ، تەجەۋ ساياساتى جۇرەدى.
مەنىڭ ويىمشا، ءحارريستىڭ جەڭىسىنە قۋانامىز. ال ترامپ كەلەتىن بولسا، رەسەيمەن قارىم-قاتىناسىنداعى وزگەرىستەر ورتالىق ازياعا، بىزگە سالقىن اسەر ەتەدى. ءبارى اينالىپ كەلگەندە حالىقارالىق جۇيەگە اسەر ەتەدى. ءبىز بولجاپ بولمايتىن وقيعالار باستالىپ كەتۋى مۇمكىن. حارريس ورتالىق ازياعا جاڭا ءبىر كوزقاراس تانىتۋى مۇمكىن، ول - اق ءۇيدىڭ ماڭىنداعى بيۋروكراتتاردىڭ وكىلى، تۇراقتىلىقتىڭ "گارانتياسى". ال ترامپ كەلسە، ۋكرايناداعى جاعداي ۇزاققا سوزىلاتىن داۋعا اينالۋى مۇمكىن. سوندىقتان، مەنىڭ ويىمشا، ءحارريستىڭ كەلگەنى قازاقستانعا ءتيىمدى. ورتالىق ازياعا تىكەلەي اسەرى بولماسا دا، شەشىمدەرى ارقىلى اينالىپ كەلگەندە اسەرى بولادى"، - دەدى ول.
