AQSh prezidentiniń arnaiy ókili Stiven Ýitkoff 17 sáýirde Parijde Eýropa elderi delegatsiiasynyń ókilderine Ýkrainadaǵy soǵysty toqtatýǵa arnalǵan qujatty tanystyrdy. Bul týraly Reuters agenttigi habarlady, dep habarlaidy Dalanews.kz.
Jariialanǵan qujatqa sáikes, Ýkraina “Eýropa jáne Eýropaǵa jatpaityn elder tobynan” qaýipsizdik kepildigin alýy tiis. Al buǵan jaýap retinde Ýkraina NATO-ǵa qosylýdan bas tartady, biraq Eýropalyq odaqqa múshelikke umtylýyna múmkindik saqtalady.
Sondai-aq qujatta AQSh Qyrymdy de-iýre Reseidiń aýmaǵy retinde tanityny kórsetilgen. Bul rette másele Ýkrainanyń emes, AQSh-tyń resmi ustanymyna qatysty bolyp otyr. Alaida Qyrymdy halyqaralyq qaýymdastyq áli kúnge deiin Ýkraina jeri dep sanaidy jáne qujatta onyń qalai júzege asatyny naqtylanbaǵan.
Sonymen birge AQSh Lýgansk oblysynyń, sondai-aq Herson, Zaporoje jáne Donetsk oblystarynyń bir bóliginiń Resei baqylaýynda ekenin de-fakto moiyndaityny jazylǵan. Al Harkov oblysynan Resei áskeriniń shyǵarylýy qajet ekeni kórsetilgen.
Qujatta Zaporoje atom elektr stantsiiasy Ýkrainaǵa qaitarylýy tiis ekeni, biraq onyń basqarýyn AQSh óz qolyna alatyny aitylǵan. Budan bólek, Ýkraina Dnepr ózeninde keme qozǵalysynyń erkindigin qalpyna keltirip, Kinbýrn túbegine baqylaýdy qaita ornatýy tiis.
Sonymen qatar qujatta Reseige qarsy sanktsiialardyń alynýy, Ýkrainany qalpyna keltirý jáne oǵan qarjylai ótemaqy tóleý máseleleri de qamtylǵan.
