اقش پرەزيدەنتىنىڭ ارنايى وكىلى ستيۆەن ۋيتكوفف 17 ساۋىردە پاريجدە ەۋروپا ەلدەرى دەلەگاسياسىنىڭ وكىلدەرىنە ۋكرايناداعى سوعىستى توقتاتۋعا ارنالعان قۇجاتتى تانىستىردى. بۇل تۋرالى Reuters اگەنتتىگى حابارلادى، دەپ حابارلايدى Dalanews.kz.

جاريالانعان قۇجاتقا سايكەس، ۋكراينا “ەۋروپا جانە ەۋروپاعا جاتپايتىن ەلدەر توبىنان” قاۋىپسىزدىك كەپىلدىگىن الۋى ءتيىس. ال بۇعان جاۋاپ رەتىندە ۋكراينا ناتو-عا قوسىلۋدان باس تارتادى، ءبىراق ەۋروپالىق وداققا مۇشەلىككە ۇمتىلۋىنا مۇمكىندىك ساقتالادى.

سونداي-اق قۇجاتتا اقش قىرىمدى دە-يۋرە رەسەيدىڭ اۋماعى رەتىندە تانيتىنى كورسەتىلگەن. بۇل رەتتە ماسەلە ۋكراينانىڭ ەمەس، اقش-تىڭ رەسمي ۇستانىمىنا قاتىستى بولىپ وتىر. الايدا قىرىمدى حالىقارالىق قاۋىمداستىق ءالى كۇنگە دەيىن ۋكراينا جەرى دەپ سانايدى جانە قۇجاتتا ونىڭ قالاي جۇزەگە اساتىنى ناقتىلانباعان.

سونىمەن بىرگە اقش لۋگانسك وبلىسىنىڭ، سونداي-اق حەرسون، زاپوروجە جانە دونەسك وبلىستارىنىڭ ءبىر بولىگىنىڭ رەسەي باقىلاۋىندا ەكەنىن دە-فاكتو مويىندايتىنى جازىلعان. ال حاركوۆ وبلىسىنان رەسەي اسكەرىنىڭ شىعارىلۋى قاجەت ەكەنى كورسەتىلگەن.

قۇجاتتا زاپوروجە اتوم ەلەكتر ستانسياسى ۋكرايناعا قايتارىلۋى ءتيىس ەكەنى، ءبىراق ونىڭ باسقارۋىن اقش ءوز قولىنا الاتىنى ايتىلعان. بۇدان بولەك، ۋكراينا دنەپر وزەنىندە كەمە قوزعالىسىنىڭ ەركىندىگىن قالپىنا كەلتىرىپ، كينبۋرن تۇبەگىنە باقىلاۋدى قايتا ورناتۋى ءتيىس.

سونىمەن قاتار قۇجاتتا رەسەيگە قارسى سانكسيالاردىڭ الىنۋى، ۋكراينانى قالپىنا كەلتىرۋ جانە وعان قارجىلاي وتەماقى تولەۋ ماسەلەلەرى دە قامتىلعان.