Ýkraina prezidenti Vladimir Zelenskii Time basylymyna bergen suhbatynda AQSh-tyń ustanymy jaily sóz qozǵady, dep habarlaidy Dalanews.kz.
Aitýynsha, ol AQSh-ty Ýkraina men Resei arasynda "beitarap" pozitsiiasyn ustanýǵa shaqyrǵan.
"Olar (AQSh) bizben birge emes. Jalpy, meniń oiymsha, Amerika biligi bul ustanymyn jasyrmaidy. Olar ózin ara aǵaiyn retinde kórsetkisi keledi, bir jaqtyń múddesin ashyq qorǵaýdan qashyp otyr. Biz olarǵa: "Eger bizdiń jaǵymyzda bolmasańyzdar, tym bolmasa beitarap qalýlaryńyzdy qalaimyz" dep aittyq", – dedi Zelenskii.
Onyń pikirinshe, AQSh-tyń bul ustanymy Birikken Ulttar Uiymyndaǵy (BUU) daýys berý kezinde de kórinis tapty. Vashington men Máskeý Ýkrainadaǵy soǵysqa qatysty qarar boiynsha birge daýys bergen. Zelenskiidiń aitýynsha, bul áreket Reseidiń múddesine qyzmet etedi.
Jýrnalistiń "Bul týraly Tramppen sóilestińiz be?" degen suraǵyna Zelenskii: "BAQ ókilderi arqyly óz ýájimdi jetkizip júrmin. Al Tramppen sóileskende áńgime basqasha órbidi. Biz sol sátte jasai alatyn naqty qadamdardy talqylaimyz", – dep jaýap berdi.
Sonymen qatar Ýkraina tarapy Reseidiń atysty tolyq toqtatýdan bas tartqan jaǵdaida, oǵan qosymsha sanktsiialar engizýdi usynǵan.
"Biz AQSh-tan osy baǵytta naqty áreket kútemiz", – dedi Zelenskii.
Onyń pikirinshe, Resei kelissózder barysynda óz talaptaryn ádeii tym joǵary qoiyp, keiin belgili bir tarmaqtardan bas tartý arqyly ózine tiimdi manevr jasaýǵa tyrysady.
23-25 naýryz kúnderi Er-Riiadta AQSh Resei men Ýkraina ókilderimen jeke kezdesýler ótkizdi. Aq úidiń málimdeýinshe, kelissózder Qara teńizdegi keme qatynasynyń qaýipsizdigin qamtamasyz etý jáne eki eldiń energetikalyq infraqurylymyna shabýyl jasamaý tetikterin ázirleý máselelerine arnaldy.
Kreml bul kezdesýlerdiń nátijesinde "Qara teńiz bastamasyn" júzege asyrý jóninde kelisim jasalǵanyn habarlady. Onyń aiasynda Qara teńizdegi keme qatynasynyń qaýipsizdigine kepildik berý, sondai-aq belgili bir sanktsiialyq shekteýler alynǵannan keiin Reseidiń aýyl sharýashylyq ónimderi men tyńaitqyshtaryn álemdik naryqqa qaita shyǵarý máseleleri qamtylǵan.
Máskeý men Vashington 18 naýryzdan bastap 30 kúnge energiia nysandaryna soqqy jasamaý týraly moratorii engizýge kelisti. Alaida eger taraptardyń biri kelisimdi buzsa, ekinshisi ony qaita qarastyra alady. Resei Qorǵanys ministrligi birneshe ret Ýkraina qarýly kúshterin bul kelisimdi buzyp, energetikalyq infraqurylymdarǵa soqqy jasaǵan dep aiyptady.
Resei tarapy Ýkrainaǵa basqa elderden áskeri kómek kórsetilýine túbegeili qarsy ekenin málimdep, bul úderisti toqtatýdy talap etýde.
