ۋكراينا پرەزيدەنتى ۆلاديمير زەلەنسكيي Time باسىلىمىنا بەرگەن سۇحباتىندا اقش-تىڭ ۇستانىمى جايلى ءسوز قوزعادى، دەپ حابارلايدى Dalanews.kz.
ايتۋىنشا، ول اقش-تى ۋكراينا مەن رەسەي اراسىندا "بەيتاراپ" پوزيسياسىن ۇستانۋعا شاقىرعان.
"ولار (اقش) بىزبەن بىرگە ەمەس. جالپى، مەنىڭ ويىمشا، امەريكا بيلىگى بۇل ۇستانىمىن جاسىرمايدى. ولار ءوزىن ارا اعايىن رەتىندە كورسەتكىسى كەلەدى، ءبىر جاقتىڭ مۇددەسىن اشىق قورعاۋدان قاشىپ وتىر. ءبىز ولارعا: "ەگەر ءبىزدىڭ جاعىمىزدا بولماساڭىزدار، تىم بولماسا بەيتاراپ قالۋلارىڭىزدى قالايمىز" دەپ ايتتىق"، – دەدى زەلەنسكيي.
ونىڭ پىكىرىنشە، اقش-تىڭ بۇل ۇستانىمى بىرىككەن ۇلتتار ۇيىمىنداعى (بۇۇ) داۋىس بەرۋ كەزىندە دە كورىنىس تاپتى. ۆاشينگتون مەن ماسكەۋ ۋكرايناداعى سوعىسقا قاتىستى قارار بويىنشا بىرگە داۋىس بەرگەن. زەلەنسكييدىڭ ايتۋىنشا، بۇل ارەكەت رەسەيدىڭ مۇددەسىنە قىزمەت ەتەدى.
ءجۋرناليستىڭ "بۇل تۋرالى ترامپپەن سويلەستىڭىز بە؟" دەگەن سۇراعىنا زەلەنسكيي: "ب ا ق وكىلدەرى ارقىلى ءوز ءۋاجىمدى جەتكىزىپ ءجۇرمىن. ال ترامپپەن سويلەسكەندە اڭگىمە باسقاشا ءوربيدى. ءبىز سول ساتتە جاساي الاتىن ناقتى قادامداردى تالقىلايمىز"، – دەپ جاۋاپ بەردى.
سونىمەن قاتار ۋكراينا تاراپى رەسەيدىڭ اتىستى تولىق توقتاتۋدان باس تارتقان جاعدايدا، وعان قوسىمشا سانكسيالار ەنگىزۋدى ۇسىنعان.
"ءبىز اقش-تان وسى باعىتتا ناقتى ارەكەت كۇتەمىز"، – دەدى زەلەنسكيي.
ونىڭ پىكىرىنشە، رەسەي كەلىسسوزدەر بارىسىندا ءوز تالاپتارىن ادەيى تىم جوعارى قويىپ، كەيىن بەلگىلى ءبىر تارماقتاردان باس تارتۋ ارقىلى وزىنە ءتيىمدى مانيەۆر جاساۋعا تىرىسادى.
23-25 ناۋرىز كۇندەرى ەر-ريادتا اقش رەسەي مەن ۋكراينا وكىلدەرىمەن جەكە كەزدەسۋلەر وتكىزدى. اق ءۇيدىڭ مالىمدەۋىنشە، كەلىسسوزدەر قارا تەڭىزدەگى كەمە قاتىناسىنىڭ قاۋىپسىزدىگىن قامتاماسىز ەتۋ جانە ەكى ەلدىڭ ەنەرگەتيكالىق ينفراقۇرىلىمىنا شابۋىل جاساماۋ تەتىكتەرىن ازىرلەۋ ماسەلەلەرىنە ارنالدى.
كرەمل بۇل كەزدەسۋلەردىڭ ناتيجەسىندە "قارا تەڭىز باستاماسىن" جۇزەگە اسىرۋ جونىندە كەلىسىم جاسالعانىن حابارلادى. ونىڭ اياسىندا قارا تەڭىزدەگى كەمە قاتىناسىنىڭ قاۋىپسىزدىگىنە كەپىلدىك بەرۋ، سونداي-اق بەلگىلى ءبىر سانكسيالىق شەكتەۋلەر الىنعاننان كەيىن رەسەيدىڭ اۋىل شارۋاشىلىق ونىمدەرى مەن تىڭايتقىشتارىن الەمدىك نارىققا قايتا شىعارۋ ماسەلەلەرى قامتىلعان.
ماسكەۋ مەن ۆاشينگتون 18 ناۋرىزدان باستاپ 30 كۇنگە ەنەرگيا نىساندارىنا سوققى جاساماۋ تۋرالى موراتوريي ەنگىزۋگە كەلىستى. الايدا ەگەر تاراپتاردىڭ ءبىرى كەلىسىمدى بۇزسا، ەكىنشىسى ونى قايتا قاراستىرا الادى. رەسەي قورعانىس مينيسترلىگى بىرنەشە رەت ۋكراينا قارۋلى كۇشتەرىن بۇل كەلىسىمدى بۇزىپ، ەنەرگەتيكالىق ينفراقۇرىلىمدارعا سوققى جاساعان دەپ ايىپتادى.
رەسەي تاراپى ۋكرايناعا باسقا ەلدەردەن اسكەري كومەك كورسەتىلۋىنە تۇبەگەيلى قارسى ەكەنىن مالىمدەپ، بۇل ۇدەرىستى توقتاتۋدى تالاپ ەتۋدە.
