AQSh pen Qytai kóshbasshylary Si Tszinpinniń Vashingtonǵa jasaǵan memlekettik sapary barysynda ózara saýda tarifterin jalpy somasy 30 mlrd dollar kóleminde tómendetýge kelisti, dep habarlaidy dalanews.kz.
Qytai Syrtqy ister ministrliginiń málimetinshe, Si Tszinpin men AQSh prezidenti Donald Tramp eki el arasyndaǵy saýda-ekonomikalyq konsýltatsiialar tetiginiń jumysyn oń baǵalap, qol jetkizilgen kelisimderdiń oryndalýyn qamtamasyz etýdi tapsyrǵan.
Fox News arnasynyń Aq úige silteme jasap habarlaýynsha, kelisim AQSh-tyń aýyl sharýashylyǵy ónimderi, balyq jáne teńiz ónimderi, óńdelmegen aǵash, kosmetika men meditsinalyq buiymdar eksportyna, sondai-aq Qytaidan ákelinetin shaǵyn turmystyq tehnika, oiynshyqtar, merekelik áshekeiler jáne balalarǵa arnalǵan avtokreslolar importyna qatysty.
Eske salaiyq, 2025 jyldyń aqpanynda Donald Tramp Qytaidan keletin barlyq taýarǵa 10 paiyzdyq tarif engizgen bolatyn. Buǵan jaýap retinde Qytai AQSh-tyń kómirine, suiytylǵan tabiǵi gazyna, shiki munaiyna jáne avtomobilderine baj salyǵyn saldy. 2025 jyldyń sáýirinde AQSh tarifteri 145 paiyzǵa deiin kóterilse, Qytai amerikalyq taýarlarǵa salynatyn baj mólsherin 125 paiyzǵa deiin jetkizgen.
Keiinirek, 2025 jyldyń mamyrynda Jenevada ótken kelissózder barysynda taraptar 90 kúndik saýda bitimine kelip, AQSh tarifterin 30 paiyzǵa, al Qytai tarifterin 10 paiyzǵa deiin tómendetken edi. AQSh qarjy ministri Skott Bessent 23 qyrkúiekte bul saýda kelisiminiń merzimi 2027 jylǵy 10 qańtarǵa deiin uzartylǵanyn málimdedi.
Kelissózder barysynda Tramp pen Si jasandy intellekt máselesin de talqylady. Taraptar tehnologiianyń táýekelderi men artyqshylyqtaryna qatysty turaqty dialog júrgizýge jáne jasandy intellektke bailanysty oqiǵalardy talqylaityn arnaiy bailanys arnasyn qurýǵa ýaǵdalasty.
Sonymen qatar AQSh pen Qytai basshylary Aziia-Tynyq muhity ekonomikalyq yntymaqtastyǵy uiymynyń (ATES) beiresmi sammiti men G20 kezdesýin ótkizýge ózara qoldaý bildirýge kelisti. Eki el kóshbasshysy bul is-sharalarǵa qatysý nietin rastady.
Sondai-aq taraptar Irannyń iadrolyq baǵdarlamaǵa qatysty halyqaralyq mindettemelerdi oryndaýy qajet ekenin atap ótip, halyqaralyq sý joldary arqyly ótý úshin eshbir memleket aqy talap etpeýi tiis degen ortaq ustanym bildirdi.
