Juma kúni álemdik naryqta munai baǵasy arzandai bastady. Buǵan AQSh pen Iran arasyndaǵy qaqtyǵysty toqtatý jónindegi kelissózder áser etken. Degenmen energetikalyq nysandarǵa jasalyp jatqan shabýyldar baǵanyń kúrt tómendeýine jol bermei otyr, dep habarlaidy dalanews.kz reuters agenttigine silteme jasap.
Brent markaly munaidyń baǵasy 0,87 dollarǵa nemese 0,82 paiyzǵa tómendep, barreline 105,73 dollar boldy. Al WTI baǵasy 1,56 dollarǵ, iaǵni 1,65 paiyzǵa arzandap, 93,05 dollarǵa tústi.
Buǵan deiin munai naryǵynda baǵa qubylyp, eki negizgi markanyń quny bir kúnde 5 paiyzǵa deiin kóterilgen edi. Saýda qorytyndysynda Brent 3,4 paiyzǵa, WTI 2,7 paiyzǵa qymbattady.
Qazir Brent pen WTI arasyndaǵy baǵa aiyrmasy barreline 12,68 dollarǵa jetti. Bul mamyr aiynan bergi eń joǵary kórsetkish. Amerikalyq munaidyń baǵasyna AQSh-tyń dizel otynyn eksporttaýǵa tyiym salýy múmkin degen qaýip te yqpal etip otyr.
Osy ýaqytta AQSh pen Iran ókilderi Niý-Iorkte qaqtyǵysty kezeń-kezeńimen toqtatý múmkindigin talqylap jatyr. Usynylyp otyrǵan jospar boiynsha Ormýz buǵazy arqyly keme qatynasy qaita jandanýy múmkin. Onyń ornyna Vashingtonnan Iranǵa salynǵan ekonomikalyq shekteýlerdi alyp tastaý talap etiledi.
Aqpan aiynyń sońynda bastalǵan qaqtyǵystan beri álemdik munai men gaz jetkiziliminiń shamamen besten bir bóligi irkiliske ushyraǵan. Sonyń saldarynan naýryzda munai baǵasy kúrt ósip, suiytylǵan tabiǵi gaz satyp alýshylar balama jetkizýshiler izdei bastaǵan.
Alaida taraptardyń ortaq kelisimge keletini ázirge belgisiz. Iran prezidenti Masýd Pezeshkian soǵystyń aiaqtalýy AQSh-tyń sheshimine bailanysty ekenin málimdedi.
Sonymen qatar aimaqtaǵy energetikalyq infraqurylymǵa jańa shabýyldar jasalý qaýpi saqtalyp otyr. Saýd Arabiiasy Iran qoldaityn hýsitter Taif qalasy men Ianbý aimaǵyna qarai ushyrǵan alty ballistikalyq zymyrannyń jolda joiylǵanyn habarlady.
"Negizgi munai nysandaryna tóngen qaýip áli de seiilgen joq", – dedi KCM Trade kompaniiasynyń bas sarapshysy Tim Ýoterer.
Qalyptasqan jaǵdaiǵa bailanysty Saýd Arabiiasy munaidy Qyzyl teńiz jaǵalaýyndaǵy Ianbý terminalyna jetkizetin East-West qubyry arqyly tasymaldaý kólemin arttyryp jatyr. Alaida tankerlermen munai jóneltý áli qalpyna keltirilgen joq.
