Álemdik naryqta munai arzandap, sońǵy 12 kúndegi eń tómengi deńgeige tústi. Buǵan AQSh pen Iran arasyndaǵy qarym-qatynastyń jumsarýy múmkin degen úmit pen Saýd Arabiiasynan munai jetkiziliminiń artýy sebep boldy, dep habarlaidy dalanews.kz.
Dúisenbi kúngi saýdada qarasha aiynda jetkiziletin Brent markaly munaidyń bir barreli 3,4%-ǵa arzandap, 100,34 dollar boldy. Al qazan aiyna arnalǵan WTI markaly munai baǵasy 4,51%-ǵa tómendep, 95,78 dollarǵa jetti. Qarashadaǵy WTI kelisimsharty 92,47 dollar deńgeiinde saýdalandy.
20 qyrkúiekte AQSh pen Iran bir-birine qatań málimdemeler jasaǵanymen, AQSh prezidenti Donald Tramp BUU Bas Assambleiasy aiasynda Niý-Iorkte Iran prezidenti Masýd Pezeshkianmen kezdesýge daiyn ekenin aitty.
Osy habardan keiin investorlar taraptardyń osy aptada kelissóz ústeline qaita otyrýy múmkin degen úmitke ie boldy. Al Jazeera málimetinshe, Iran kelissózderdi qaita bastaýǵa qatysty óz ustanymyn deldaldar arqyly jetkizgen. Alaida óńirdegi ahýal áli de turaqtalǵan joq.
Iran qoldaityn hýsitter Er-Riiad qalasy men Ianbýdaǵy Saudi Aramco nysandaryna soqqy jasaǵanyn málimdedi. Buǵan deiin East-West munai qubyryna jasalǵan shabýyldan keiin kompaniia munaidy Ormýz buǵazy arqyly kóbirek tasymaldap, Ianbý baǵytymen jóneltiletin kólemniń bir bóligin qysqartqan.
Derekkózderdiń aitýynsha, Saýd Arabiiasynyń ótinishinen keiin Qytai da Irannan hýsitterdiń áreketin tejeýge yqpal etýdi suraǵan. 20 qyrkúiekte Saudi Aramco Parsy shyǵanaǵyndaǵy jeti iri tankerge shamamen 14 million barrel munai tiegen. Sońǵy alty kúnde Ormýz buǵazy arqyly táýligine orta eseppen 2,9 million barrel saýd munaiy ótken. Al tamyz aiynda bul kórsetkish shamamen 700 myń barrel bolǵan.
Sarapshylardyń pikirinshe, munai jetkiziliminiń qaita artýy naryqtaǵy baǵanyń tómendeýine áser etip otyr. Sonymen qatar Liviiadaǵy iri Sharara ken ornynda óndiris kólemi azaiǵan. Biraq eldiń Ulttyq munai korporatsiiasy ázirge onyń naqty sebebin jariialaǵan joq.
