Әлемдік нарықта мұнай арзандап, соңғы 12 күндегі ең төменгі деңгейге түсті. Бұған АҚШ пен Иран арасындағы қарым-қатынастың жұмсаруы мүмкін деген үміт пен Сауд Арабиясынан мұнай жеткізілімінің артуы себеп болды, деп хабарлайды dalanews.kz.
Дүйсенбі күнгі саудада қараша айында жеткізілетін Brent маркалы мұнайдың бір баррелі 3,4%-ға арзандап, 100,34 доллар болды. Ал қазан айына арналған WTI маркалы мұнай бағасы 4,51%-ға төмендеп, 95,78 долларға жетті. Қарашадағы WTI келісімшарты 92,47 доллар деңгейінде саудаланды.
20 қыркүйекте АҚШ пен Иран бір-біріне қатаң мәлімдемелер жасағанымен, АҚШ президенті Дональд Трамп БҰҰ Бас Ассамблеясы аясында Нью-Йоркте Иран президенті Масуд Пезешкианмен кездесуге дайын екенін айтты.
Осы хабардан кейін инвесторлар тараптардың осы аптада келіссөз үстеліне қайта отыруы мүмкін деген үмітке ие болды. Al Jazeera мәліметінше, Иран келіссөздерді қайта бастауға қатысты өз ұстанымын делдалдар арқылы жеткізген. Алайда өңірдегі ахуал әлі де тұрақталған жоқ.
Иран қолдайтын хуситтер Эр-Рияд қаласы мен Янбудағы Saudi Aramco нысандарына соққы жасағанын мәлімдеді. Бұған дейін East-West мұнай құбырына жасалған шабуылдан кейін компания мұнайды Ормуз бұғазы арқылы көбірек тасымалдап, Янбу бағытымен жөнелтілетін көлемнің бір бөлігін қысқартқан.
Дереккөздердің айтуынша, Сауд Арабиясының өтінішінен кейін Қытай да Ираннан хуситтердің әрекетін тежеуге ықпал етуді сұраған. 20 қыркүйекте Saudi Aramco Парсы шығанағындағы жеті ірі танкерге шамамен 14 миллион баррель мұнай тиеген. Соңғы алты күнде Ормуз бұғазы арқылы тәулігіне орта есеппен 2,9 миллион баррель сауд мұнайы өткен. Ал тамыз айында бұл көрсеткіш шамамен 700 мың баррель болған.
Сарапшылардың пікірінше, мұнай жеткізілімінің қайта артуы нарықтағы бағаның төмендеуіне әсер етіп отыр. Сонымен қатар Ливиядағы ірі Шарара кен орнында өндіріс көлемі азайған. Бірақ елдің Ұлттық мұнай корпорациясы әзірге оның нақты себебін жариялаған жоқ.
