Aqmola oblysynyń Arshaly aýdanyndaǵy Jibek joly aýylynda quny 1,65 mlrd teńge bolatyn dene shynyqtyrý-saýyqtyrý kesheniniń qurylysy tótenshe jaǵdai saldaryn joiý negizdemesimen tikelei kelisimshart arqyly júrgizilip jatyr, dep habarlaidy Dalanews.
Telegram-daǵy «Pýteshestviia po goszakýpkam» arnasynyń málimetinshe, memlekettik satyp alý konkýrstyq rásimdersiz, bir kózden tikelei shart jasasý tásilimen rásimdelgen. Qujattarda mundai sheshimge tótenshe jaǵdaidyń saldaryn joiý negiz bolǵany kórsetilgen.
Alaida jariialanǵan qujattarda naqty qandai tótenshe jaǵdai týraly sóz bolyp otyrǵany kórsetilmegen. Sondai-aq dene shynyqtyrý-saýyqtyrý kesheniniń qurylysy tótenshe jaǵdaidyń saldaryn joiýmen qalai bailanysty ekeni túsindirilmegen.
Budan bólek, satyp alý qujattamasynda tehnikalyq sipattama men jobanyń egjei-tegjeili mazmuny joq. Onda tek nysannyń ataýy – dene shynyqtyrý-saýyqtyrý kesheniniń qurylysy ǵana kórsetilgen.
Jariialanǵan málimetke sáikes, satyp alý rásiminde silteme jasalǵan buiryqta jekelegen taýarlar, jumystar men qyzmetterdi bir kózden tikelei shart jasasý arqyly satyp alýǵa múmkindik qarastyrylǵan.
Sondai-aq jariialanym avtorlarynyń aitýynsha, merdiger uiym memlekettik satyp alýǵa 2022 jyldan beri qatysyp keledi. Buǵan deiin ol negizinen taýar jetkizý jáne shaǵyn ǵimarattarǵa aǵymdaǵy jóndeý jumystaryn júrgizýmen ainalysqan. Onyń aldyńǵy kelisimsharttarynyń quny 20 mln teńgeden aspaǵan.
Aqparatqa sáikes, Arshaly aýdanynda dene shynyqtyrý-saýyqtyrý keshenderiniń qurylysy alǵash ret qolǵa alynyp otyrǵan joq. Olardyń birqatary paidalanýǵa berilgen.
Eske salaiyq, buǵan deiin Aqmola oblysynyń Býrabai aýdanynda Ulttyq qaýipsizdik komiteti ǵimaratyn 26 mln teńgege jóndeý jumystary da tikelei kelisimshart arqyly rásimdelgen bolatyn. Ol kezde de memlekettik satyp alý týraly zańdaǵy erekshelik negiz retinde kórsetilgenimen, mundai shuǵyl satyp alýǵa qandai jaǵdai sebep bolǵany ashyq túsindirilmegen.
