Búgin Abai ýniveristetinde aqyn, jýrnalist, etnograf, Qazaqstannyń eńbek sińirgen qairatkeri Qasymhan Begmanovtyń «Kóktemge hat» atty án-jyr keshi uiymdastyryldy. «Adal azamat» jobasy aiasynda ótken taǵylymdy sharada qalamger jastarmen ashyq suhbat quryp, poeziia men án arqyly júrek syryn aqtardy. Kóktem lebindei sezilgen bul rýhani kesh stýdentterdiń ádebietke degen qyzyǵýshylyǵyn arttyryp, áserli dialog alańyna ainaldy, dep habarlaidy Dalanews.kz.
Qazaq rýhaniiatynyń kórnekti ókili Qasymhan Begmanov – jyr men tarihty, sezim men zerdeni sabaqtastyra bilgen qalamger. Jarty ǵasyrǵa jýyq ýaqyt boiy ádebiet pen jýrnalistika salasynda ónimdi eńbek etip, ult murasyn túgendeýge, rýhani qundylyqtardy dáripteýge súbeli úles qosqan ádebiet ókili. Aqynnyń syrshyl poeziiasy talai býyn oqyrmannyń júregine jol taýyp, ásirese jastardyń sezim álemimen úndesip, úilesim tapqan. Ýniversitettiń ónersúier jastary qadirli qonaqty erekshe yqylaspen qarsy alyp, rýhani keshti shynaiy qurmet pen ystyq yqylasqa bóledi.
– Búgingi shara sizderge arnalǵan, jastar. Bul keshte kóktemge degen saǵynyshtaryńyzdy basyp, mahabbat týraly jyr-shýmaqtar oqimyz. Sizdermen jolyǵyp otyrǵanyma qýanyshtymyn. Suraqtaryńyzdy qoiyp, ashyq, syrly suhbat júrgizeiik, – dep aǵynan jaryldy aqyn.
Aqynnyń bul sózi keshtiń shyraiyn kirgizip, jinalǵan qaýymdy erkin de emen-jarqyn áńgimege jeteledi.
Kesh barysynda ýniversitettiń ónerli jastary kópshilikke keńinen tanymal «Ol kóktem oralmaidy», «Baqyttymyn ózińmen» ánderin shyrqap, kórermen kóńilin kókjiekke samǵatsa, Orazaly Dosbosynov atyndaǵy jas aqyndar ortalyǵynyń músheleri aqynǵa arnaǵan jyr joldaryn tebirenispen shyrqady. Respýblikaǵa tanymal akademik-ǵalymdar, aqyn-jazýshylar men jýrnalister rýhani sharanyń qadirmendi qonaǵyna ainalyp, ádebiet pen ónerdiń altyn arqaýyn jalǵaǵan keshtiń kýási boldy.
Shara barysynda Shaba Ádenqulqyzy Qasymhan aqynnyń «Armanym ediń», «Meniń de daýysym estiler» ánderin naqyshyna keltire oryndasa, jas ánshi Jaqsybek Qalelbek «Men súigen qyzdar» ánin áýeletti. Al Aqsuńqar Aqynbabaqyzynyń oryndaýyndaǵy «Toǵyspaǵan taǵdyrym» áni kórermen júregine názik muń syilap, zal ishi únsiz tolǵanysqa bólendi.
Keshtiń sońy syrly áńgimege ulasyp, aqyn men stýdentter arasynda shynaiy dialog órbidi. «Ǵashyqtyq degen ne?» degen júrekke jaqyn saýalǵa jaýap retinde oqylǵan zaldaǵy jas kórermenniń jan dúniesin dir etkizip, mahabbattyń máńgilik taqyryp ekenin taǵy bir márte aiqyndaǵandai. Sondai-aq «Sherli Túrkistan» tarihyna qatysty tereń saýal qoiylyp, zertteýshi aqyn tarih taǵylymyn tarqata aityp, ótken men búgindi sabaqtastyrǵan mazmundy oilarymen bólisti.
Án men jyrdyń áýeni qatar órbigen romantikalyq kesh stýdentterdiń kókeiindegi saýaldarǵa jaýap berip qana qoimai, olardyń rýhani kókjiegin keńeitip, ádebietke degen ińkárligin arttyrdy. Júrek túkpirindegi názik sezimderdi qozǵaǵan bul júzdesý júrekterge jylý, kóńilge shýaq syilaǵan taǵylymdy basqosý boldy.
