بۇگىن اباي ۋنيۆەريستەتىندە اقىن، جۋرناليست، ەتنوگراف، قازاقستاننىڭ ەڭبەك سىڭىرگەن قايراتكەرى قاسىمحان بەگمانوۆتىڭ «كوكتەمگە حات» اتتى ءان-جىر كەشى ۇيىمداستىرىلدى. «ادال ازامات» جوباسى اياسىندا وتكەن تاعىلىمدى شارادا قالامگەر جاستارمەن اشىق سۇحبات قۇرىپ، پوەزيا مەن ءان ارقىلى جۇرەك سىرىن اقتاردى. كوكتەم لەبىندەي سەزىلگەن بۇل رۋحاني كەش ستۋدەنتتەردىڭ ادەبيەتكە دەگەن قىزىعۋشىلىعىن ارتتىرىپ، اسەرلى ديالوگ الاڭىنا اينالدى، دەپ حابارلايدى Dalanews.kz.
قازاق رۋحانياتىنىڭ كورنەكتى وكىلى قاسىمحان بەگمانوۆ – جىر مەن تاريحتى، سەزىم مەن زەردەنى ساباقتاستىرا بىلگەن قالامگەر. جارتى عاسىرعا جۋىق ۋاقىت بويى ادەبيەت پەن جۋرناليستيكا سالاسىندا ءونىمدى ەڭبەك ەتىپ، ۇلت مۇراسىن تۇگەندەۋگە، رۋحاني قۇندىلىقتاردى دارىپتەۋگە سۇبەلى ۇلەس قوسقان ادەبيەت وكىلى. اقىننىڭ سىرشىل پوەزياسى تالاي بۋىن وقىرماننىڭ جۇرەگىنە جول تاۋىپ، اسىرەسە جاستاردىڭ سەزىم الەمىمەن ۇندەسىپ، ۇيلەسىم تاپقان. ۋنيۆەرسيتەتتىڭ ونەرسۇيەر جاستارى ءقادىرلى قوناقتى ەرەكشە ىقىلاسپەن قارسى الىپ، رۋحاني كەشتى شىنايى قۇرمەت پەن ىستىق ىقىلاسقا بولەدى.
– بۇگىنگى شارا سىزدەرگە ارنالعان، جاستار. بۇل كەشتە كوكتەمگە دەگەن ساعىنىشتارىڭىزدى باسىپ، ماحاببات تۋرالى جىر-شۋماقتار وقيمىز. سىزدەرمەن جولىعىپ وتىرعانىما قۋانىشتىمىن. سۇراقتارىڭىزدى قويىپ، اشىق، سىرلى سۇحبات جۇرگىزەيىك، – دەپ اعىنان جارىلدى اقىن.
اقىننىڭ بۇل ءسوزى كەشتىڭ شىرايىن كىرگىزىپ، جينالعان قاۋىمدى ەركىن دە ەمەن-جارقىن اڭگىمەگە جەتەلەدى.
كەش بارىسىندا ۋنيۆەرسيتەتتىڭ ونەرلى جاستارى كوپشىلىككە كەڭىنەن تانىمال «ول كوكتەم ورالمايدى»، «باقىتتىمىن وزىڭمەن» اندەرىن شىرقاپ، كورەرمەن كوڭىلىن كوكجيەككە سامعاتسا، ورازالى دوسبوسىنوۆ اتىنداعى جاس اقىندار ورتالىعىنىڭ مۇشەلەرى اقىنعا ارناعان جىر جولدارىن تەبىرەنىسپەن شىرقادى. رەسپۋبليكاعا تانىمال اكادەميك-عالىمدار، اقىن-جازۋشىلار مەن جۋرناليستەر رۋحاني شارانىڭ قادىرمەندى قوناعىنا اينالىپ، ادەبيەت پەن ونەردىڭ التىن ارقاۋىن جالعاعان كەشتىڭ كۋاسى بولدى.
شارا بارىسىندا شابا ادەنقۇل قىزى قاسىمحان اقىننىڭ «ارمانىم ەدىڭ»، «مەنىڭ دە داۋىسىم ەستىلەر» اندەرىن ناقىشىنا كەلتىرە ورىنداسا، جاس ءانشى جاقسىبەك قالەلبەك «مەن سۇيگەن قىزدار» ءانىن اۋەلەتتى. ال اقسۇڭقار اقىنبابا قىزىنىڭ ورىنداۋىنداعى «توعىسپاعان تاعدىرىم» ءانى كورەرمەن جۇرەگىنە نازىك مۇڭ سىيلاپ، زال ءىشى ءۇنسىز تولعانىسقا بولەندى.
كەشتىڭ سوڭى سىرلى اڭگىمەگە ۇلاسىپ، اقىن مەن ستۋدەنتتەر اراسىندا شىنايى ديالوگ ءوربىدى. «عاشىقتىق دەگەن نە؟» دەگەن جۇرەككە جاقىن ساۋالعا جاۋاپ رەتىندە وقىلعان زالداعى جاس كورەرمەننىڭ جان دۇنيەسىن ءدىر ەتكىزىپ، ماحابباتتىڭ ماڭگىلىك تاقىرىپ ەكەنىن تاعى ءبىر مارتە ايقىنداعانداي. سونداي-اق «شەرلى تۇركىستان» تاريحىنا قاتىستى تەرەڭ ساۋال قويىلىپ، زەرتتەۋشى اقىن تاريح تاعىلىمىن تارقاتا ايتىپ، وتكەن مەن بۇگىندى ساباقتاستىرعان مازمۇندى ويلارىمەن ءبولىستى.
ءان مەن جىردىڭ اۋەنى قاتار وربىگەن رومانتيكالىق كەش ستۋدەنتتەردىڭ كوكەيىندەگى ساۋالدارعا جاۋاپ بەرىپ قانا قويماي، ولاردىڭ رۋحاني كوكجيەگىن كەڭەيتىپ، ادەبيەتكە دەگەن ىڭكارلىگىن ارتتىردى. جۇرەك تۇكپىرىندەگى نازىك سەزىمدەردى قوزعاعان بۇل جۇزدەسۋ جۇرەكتەرگە جىلۋ، كوڭىلگە شۋاق سىيلاعان تاعىلىمدى باسقوسۋ بولدى.
