Ámina Ájibaeva Almatydaǵy balalar úiinde bolǵan órtti paidalanyp aqsha jinamaýdy surady, dep habarlaidy Dalanews.kz.
"30 jyldan beri basymyzǵa túsetin synaq kóp edi. Bul da bir synaq boldy. Búgin barlyq ydys-aiaqty alyp kelip, sosyn Shamalǵan stantsiiasyna baryp balalardyń kómirin ákelip alaiyn dep kelip edim, "apa, úi órtenip jatyr", dep habar keldi. Birden qaityp keldim. Úi 4-5 saǵattan beri órtendi. Ótinip suraitynym - aqsha jinaý degen alaiaqtyqtaryńdy qaltalaryńa salyp qoiyńdar. Eshkimnen kómek surap jatqan joqpyz. Baratyn jerimiz bar. Taýda balalardyń saýmalysy bar. Sol jerge aparyp, balalardy jańǵastyramyz. Balalardyń bári aman-esen. Bir kiimmen júgirip shyǵypty. Eshkimnen kómek surap jatqan joqpyz. Osy jaǵdaidy paidalanyp, aqsha jinaityn tirshilikterińdi toqtatyńdar. Kerek bolsa ózim aitamyn. Úiden túk qalǵan joq", - deidi Ámina Ájibaeva.
Aita keteiik, kúni keshe saǵat 15:48-ten bastap órt sóndirýshiler Naýryzbai aýdany, Altyn Orda kóshesi boiynda ornalasqan ǵimarattaǵy órtti sóndirdi.
Órt shyqqan sátte balalar úiinde 35 tárbielenýshi jáne qyzmetkerler bolǵan. Barlyǵy der kezinde evakýatsiialandy. Zardap shekkender joq.
Almaty ákimdiginiń málimetinshe, qazirgi ýaqytta balalar ýaqytsha saýyqtyrý sanatoriiine ornalastyryldy. Onda qajetti kómek pen qoldaý kórsetilýde.
Balalarǵa tamaq berilip, jaiǵastyryldy. Olar syrt kiimmen, azyq-túlikpen jáne jeke gigiena quraldarymen qamtylǵan. Sondai-aq tárbielenýshilerge táttiler berildi.
Oqiǵa ornynda Almaty qalasy ákimdigi men Qoǵamdyq keńes ókilderi, Naýryzbai aýdanynyń qorǵanshylyq jáne qamqorshylyq qyzmeti, sondai-aq Otbasyny qoldaý ortalyǵy men Balalardy qoldaý ortalyǵynyń mamandary jumys istep jatyr. Jaǵdai tolyq baqylaýda.
