ءامينا اجىبايەۆا الماتىداعى بالالار ۇيىندە بولعان ءورتتى پايدالانىپ اقشا جيناماۋدى سۇرادى، دەپ حابارلايدى Dalanews.kz.
"30 جىلدان بەرى باسىمىزعا تۇسەتىن سىناق كوپ ەدى. بۇل دا ءبىر سىناق بولدى. بۇگىن بارلىق ىدىس-اياقتى الىپ كەلىپ، سوسىن شامالعان ستانسياسىنا بارىپ بالالاردىڭ كومىرىن اكەلىپ الايىن دەپ كەلىپ ەدىم، "اپا، ءۇي ورتەنىپ جاتىر"، دەپ حابار كەلدى. بىردەن قايتىپ كەلدىم. ءۇي 4-5 ساعاتتان بەرى ورتەندى. ءوتىنىپ سۇرايتىنىم - اقشا جيناۋ دەگەن الاياقتىقتارىڭدى قالتالارىڭا سالىپ قويىڭدار. ەشكىمنەن كومەك سۇراپ جاتقان جوقپىز. باراتىن جەرىمىز بار. تاۋدا بالالاردىڭ ساۋمالىسى بار. سول جەرگە اپارىپ، بالالاردى جاڭعاستىرامىز. بالالاردىڭ ءبارى امان-ەسەن. ءبىر كيىممەن جۇگىرىپ شىعىپتى. ەشكىمنەن كومەك سۇراپ جاتقان جوقپىز. وسى جاعدايدى پايدالانىپ، اقشا جينايتىن تىرشىلىكتەرىڭدى توقتاتىڭدار. كەرەك بولسا ءوزىم ايتامىن. ۇيدەن تۇك قالعان جوق"، - دەيدى ءامينا اجىبايەۆا.
ايتا كەتەيىك، كۇنى كەشە ساعات 15:48-تەن باستاپ ءورت سوندىرۋشىلەر ناۋرىزباي اۋدانى، التىن وردا كوشەسى بويىندا ورنالاسقان عيماراتتاعى ءورتتى ءسوندىردى.
ءورت شىققان ساتتە بالالار ۇيىندە 35 تاربيەلەنۋشى جانە قىزمەتكەرلەر بولعان. بارلىعى دەر كەزىندە ەۆاكۋاسيالاندى. زارداپ شەككەندەر جوق.
الماتى اكىمدىگىنىڭ مالىمەتىنشە، قازىرگى ۋاقىتتا بالالار ۋاقىتشا ساۋىقتىرۋ ساناتورييىنە ورنالاستىرىلدى. وندا قاجەتتى كومەك پەن قولداۋ كورسەتىلۋدە.
بالالارعا تاماق بەرىلىپ، جايعاستىرىلدى. ولار سىرت كيىممەن، ازىق-تۇلىكپەن جانە جەكە گيگيەنا قۇرالدارىمەن قامتىلعان. سونداي-اق تاربيەلەنۋشىلەرگە تاتتىلەر بەرىلدى.
وقيعا ورنىندا الماتى قالاسى اكىمدىگى مەن قوعامدىق كەڭەس وكىلدەرى، ناۋرىزباي اۋدانىنىڭ قورعانشىلىق جانە قامقورشىلىق قىزمەتى، سونداي-اق وتباسىنى قولداۋ ورتالىعى مەن بالالاردى قولداۋ ورتالىعىنىڭ ماماندارى جۇمىس ىستەپ جاتىر. جاعداي تولىق باقىلاۋدا.
