Jiynǵa shaqyrtylǵandar sanaýly. Olardyń arasynda aimaqtyń «Qurmetti azamattary», «Qurmet» ordeniniń iegerleri, oblystyq Ardagerler keńesiniń músheleri bar.
Erte jastan eńbekke aralasqan qarttarymyzǵa qandai qurmet kórsetse de artyq emes. Óitkeni, biri tylda jumys istese, endigisi áli kúnge aýyl sharýashylyǵy salasynda tabysty eńbek etip keledi.
Saltanatty shara ózine tán sánimen bastalyp, qariialardy kúmbirlegen kúimen qarsy aldy. Bul kezdesý, burynǵydan ózgerek desekte bolady. Sharanyń alǵashqy shymyldyǵy biylǵy indet saldarynan baqilyq bolǵan el azamattaryn eske alýmen bastaldy. Artynsha, óńirde atqarylǵan jumystar jaiynda ázirlegen beinerolik kóptiń nazaryna usynyldy.
Igi kezdesýdegi alǵashqy sózdi oblys ákimi Amandyq Ǵabbasuly aldy. Óńir basshysy óz sózinde «Biylǵy jyly jer sharyn dúrliktirgen pandemiiaǵa bailanysty ózderińizben júzdesý múmkindigi kóp bolmady. Sondyqtan da, aralaryńyzdaǵy mereitoi ielerine óz iltipatymdy bildiremekpin» dep jinalǵan ardagerlerge óziniń ystyq yqylasyn bildirdi.
– Halyq tarihynda hatqa túspegen bir asyl zańdylyq bar. Ol – úlkenge qurmet, kishige izet tanytý. Sizder Táýelsizdiktiń alǵashqy jyldarynda bar qiyndyqty kóterip, eldiń berekesin arttyryp, qyzmet jasadyńyzdar. Elge bas bolyp, ár salada eńbektenip, kóshtiń kólikti bolýyna yqpal etken – ózderińiz boldyńyzdar. Sol úshin aldyńǵy býyn aǵalar – Sizderge alǵysymyz sheksiz, – dep sózin sabaqtady Amandyq Batalov.
Saltanatty qabyldaý sharasynda Amandyq Batalov Almaty oblysynyń, Taldyqorǵan qalasynyń, Kóksý aýdanynyń «Qurmetti azamaty», Táýelsizdik merekesinde «Qurmet» ordenin ielengen, Almaty oblystyq Ardagerler keńesiniń múshesi, eńbek ardageri Dina Nurǵaliqyzyn 80-jyldyq mereitoiymen quttyqtap qurmet kórsetti.
– Pandemiiaǵa qaramastan bizdiń basmyzdy qosyp, qabyldaýyńyzǵa shaqyrǵanyńyzǵa úlken rahmet! Sizdiń bastamańyzben tolaiym tabystarǵa jetip kelemiz. Kózge kórinip turǵan is bolǵandyqtan aýyz toltyryp aitýǵa bolady. Tipti, oblystyq Ardagerler keńesi qolǵa alǵan Abai atamyzdyń 175 jyldyǵyna orai, «Ólmei tuǵyn artynda sóz qaldyrǵan…» jáne «Erliktiń dańqy, Eldiktiń narqy» atty kitaptardyń jaryq kórýine tikelei ózińiz muryndyq boldyńyz. Sol úshinde dán rizamyz. Eńbegińiz jansyn, – dep sózin qorytyndylady.
Iá, ómirden kórgen-túigeni mol abzal jandar, aq saqaldy qariia men ardaqty analar – bar jaqsyǵa laiyqty. Olardyń urpaq ulaǵatyn arttyrýdaǵy ornynyń erekshe ekeni taiǵa tańba basqandai anyq.
Jańa jyldyń qarsańynda, dóńgelek ústel basyna jinalǵan qaýymǵa Amandyq Ǵabbasuly qiynǵa túsken jylǵa qaramastan júzege asqan jumystardyń bir parasyna toqtalyp ótti.
– Elbasynyń Jarlyǵymen qurylǵan Raiymbek aýdanynyń damýyna erekshe aita ótken jón. Toqyraý jaǵdaiynda qalǵan aýdanǵa elder qaita aǵyla bastady, buryn jumys izdep ketken 2 myńǵa jýyq jastar aýdanǵa qaita oraldy. Jas mamandar úshin baspana salýdamyz, osy jyly Táýelsizdik kúnine orai mańyzdy ákimshilik jáne áleýmettik nysandardy paidalanýǵa berdik. Halyqtyń áleýmettik turǵyda osal toptaryna qajetti qoldaý turaqty negizde kórsetildi ataýly áleýmettik kómek tóleýge 8 mlrd. 879,9 mln. teńge bólinip, 28 859 otbasyǵa nemese 85 myń adamǵa qoldaý kórsetildi, onyń ishinde – 21,4 myń bala. Osyndai abyroily tabystarmen jańa 2021 jylǵa qadam basyp otyrmyz. Mańyzdy kezeń – Táýelsizdiktiń 30 jyldyǵyna jaqyndadyq, – dedi óz sózinde.
Jasyratyny joq, Bul sandardyń artynda el aǵalarynyń kúndelikti eńbegimi, ortaq maqsatqa umtylýy, qazirgi jáne bolashaq damý úshin berik irgetasty qalaǵan qurmetti ardagerlerdiń qomaqty úlesi tur. Osyǵan orai, jetisýlyqtardyń eńbegi biylǵy jyly da eleýsiz qalmady.
Táýelsizdik kúnine orai oblystyń 70-ten astam turǵyny Prezidenttiń Jarlyǵymen memlekettik nagradalarmen marapattaldy. Dariia keýde, taý músin ardaqty aqsaqaldardyń orny bólek. Halqymyzda «Aýylyńda qart bolsa, jazyp qoiǵan hatpen teń» dep bekerge aitpasa kerek. Kópti kórgen kónekóz, abzal jandardyń jastar tárbiesine aralasyp, ónegeli urpaq tárbieleýge qosar úlesi mol. Ardaqtylardyń ómir tájiribeleri aldaǵy ýaqytta da Jetisý óńiri men eldiń damýyna yqpal etetini sózsiz. Asyl jandardyń ǵumyr kóligi júrisin, júrek saǵaty soǵýyn toqtatpasyn. Altyn qazyq aǵalarymyz, aq jaýlyqty analarymyz aman bolsyn degen niet qana bizdegi.
Anar SABYROVA, Almaty oblysy.
