جيىنعا شاقىرتىلعاندار ساناۋلى. ولاردىڭ اراسىندا ايماقتىڭ «قۇرمەتتى ازاماتتارى»، «قۇرمەت» وردەنىنىڭ يەگەرلەرى، وبلىستىق ارداگەرلەر كەڭەسىنىڭ مۇشەلەرى بار.
ەرتە جاستان ەڭبەككە ارالاسقان قارتتارىمىزعا قانداي قۇرمەت كورسەتسە دە ارتىق ەمەس. ويتكەنى، ءبىرى تىلدا جۇمىس ىستەسە، ەندىگىسى ءالى كۇنگە اۋىل شارۋاشىلىعى سالاسىندا تابىستى ەڭبەك ەتىپ كەلەدى.
سالتاناتتى شارا وزىنە ءتان سانىمەن باستالىپ، قاريالاردى كۇمبىرلەگەن كۇيمەن قارسى الدى. بۇل كەزدەسۋ، بۇرىنعىدان وزگەرەك دەسەكتە بولادى. شارانىڭ العاشقى شىمىلدىعى بيىلعى ىندەت سالدارىنان باقيلىق بولعان ەل ازاماتتارىن ەسكە الۋمەن باستالدى. ارتىنشا، وڭىردە اتقارىلعان جۇمىستار جايىندا ازىرلەگەن بەينەروليك كوپتىڭ نازارىنا ۇسىنىلدى.
يگى كەزدەسۋدەگى العاشقى ءسوزدى وبلىس اكىمى اماندىق عابباس ۇلى الدى. ءوڭىر باسشىسى ءوز سوزىندە «بيىلعى جىلى جەر شارىن دۇرلىكتىرگەن پاندەمياعا بايلانىستى وزدەرىڭىزبەن جۇزدەسۋ مۇمكىندىگى كوپ بولمادى. سوندىقتان دا، ارالارىڭىزداعى مەرەيتوي يەلەرىنە ءوز ءىلتيپاتىمدى بىلدىرەمەكپىن» دەپ جينالعان ارداگەرلەرگە ءوزىنىڭ ىستىق ىقىلاسىن ءبىلدىردى.
– حالىق تاريحىندا حاتقا تۇسپەگەن ءبىر اسىل زاڭدىلىق بار. ول – ۇلكەنگە قۇرمەت، كىشىگە ىزەت تانىتۋ. سىزدەر تاۋەلسىزدىكتىڭ العاشقى جىلدارىندا بار قيىندىقتى كوتەرىپ، ەلدىڭ بەرەكەسىن ارتتىرىپ، قىزمەت جاسادىڭىزدار. ەلگە باس بولىپ، ءار سالادا ەڭبەكتەنىپ، كوشتىڭ كولىكتى بولۋىنا ىقپال ەتكەن – وزدەرىڭىز بولدىڭىزدار. سول ءۇشىن الدىڭعى بۋىن اعالار – سىزدەرگە العىسىمىز شەكسىز، – دەپ ءسوزىن ساباقتادى اماندىق باتالوۆ.
سالتاناتتى قابىلداۋ شاراسىندا اماندىق باتالوۆ الماتى وبلىسىنىڭ، تالدىقورعان قالاسىنىڭ، كوكسۋ اۋدانىنىڭ «قۇرمەتتى ازاماتى»، تاۋەلسىزدىك مەرەكەسىندە «قۇرمەت» وردەنىن يەلەنگەن، الماتى وبلىستىق ارداگەرلەر كەڭەسىنىڭ مۇشەسى، ەڭبەك ارداگەرى دينا نۇرعاليقىزىن 80-جىلدىق مەرەيتويىمەن قۇتتىقتاپ قۇرمەت كورسەتتى.
باسشىنىڭ كورسەتكەن ىقىلاسىنا ارداگەرلەردە ءوز تاراپىنان العىسىن ءبىلدىردى. سولاردىڭ ءبىرى، وبلىستىق ارداگەرلەر كەڭەسىنىڭ ءتوراعاسى ەرمەك كەلەمسەيىت.
– پاندەمياعا قاراماستان ءبىزدىڭ باسمىزدى قوسىپ، قابىلداۋىڭىزعا شاقىرعانىڭىزعا ۇلكەن راحمەت! ءسىزدىڭ باستاماڭىزبەن تولايىم تابىستارعا جەتىپ كەلەمىز. كوزگە كورىنىپ تۇرعان ءىس بولعاندىقتان اۋىز تولتىرىپ ايتۋعا بولادى. ءتىپتى، وبلىستىق ارداگەرلەر كەڭەسى قولعا العان اباي اتامىزدىڭ 175 جىلدىعىنا وراي، «ولمەي تۇعىن ارتىندا ءسوز قالدىرعان…» جانە «ەرلىكتىڭ داڭقى، ەلدىكتىڭ نارقى» اتتى كىتاپتاردىڭ جارىق كورۋىنە تىكەلەي ءوزىڭىز مۇرىندىق بولدىڭىز. سول ۇشىندە ءدان ريزامىز. ەڭبەگىڭىز جانسىن، – دەپ ءسوزىن قورىتىندىلادى.
ءيا، ومىردەن كورگەن-تۇيگەنى مول ابزال جاندار، اق ساقالدى قاريا مەن ارداقتى انالار – بار جاقسىعا لايىقتى. ولاردىڭ ۇرپاق ۇلاعاتىن ارتتىرۋداعى ورنىنىڭ ەرەكشە ەكەنى تايعا تاڭبا باسقانداي انىق.
جاڭا جىلدىڭ قارساڭىندا، دوڭگەلەك ۇستەل باسىنا جينالعان قاۋىمعا اماندىق عابباس ۇلى قيىنعا تۇسكەن جىلعا قاراماستان جۇزەگە اسقان جۇمىستاردىڭ ءبىر پاراسىنا توقتالىپ ءوتتى.
– ەلباسىنىڭ جارلىعىمەن قۇرىلعان رايىمبەك اۋدانىنىڭ دامۋىنا ەرەكشە ايتا وتكەن ءجون. توقىراۋ جاعدايىندا قالعان اۋدانعا ەلدەر قايتا اعىلا باستادى، بۇرىن جۇمىس ىزدەپ كەتكەن 2 مىڭعا جۋىق جاستار اۋدانعا قايتا ورالدى. جاس ماماندار ءۇشىن باسپانا سالۋدامىز، وسى جىلى تاۋەلسىزدىك كۇنىنە وراي ماڭىزدى اكىمشىلىك جانە الەۋمەتتىك نىسانداردى پايدالانۋعا بەردىك. حالىقتىڭ الەۋمەتتىك تۇرعىدا وسال توپتارىنا قاجەتتى قولداۋ تۇراقتى نەگىزدە كورسەتىلدى اتاۋلى الەۋمەتتىك كومەك تولەۋگە 8 ملرد. 879،9 ملن. تەڭگە ءبولىنىپ، 28 859 وتباسىعا نەمەسە 85 مىڭ ادامعا قولداۋ كورسەتىلدى، ونىڭ ىشىندە – 21،4 مىڭ بالا. وسىنداي ابىرويلى تابىستارمەن جاڭا 2021 جىلعا قادام باسىپ وتىرمىز. ماڭىزدى كەزەڭ – تاۋەلسىزدىكتىڭ 30 جىلدىعىنا جاقىندادىق، – دەدى ءوز سوزىندە.
جاسىراتىنى جوق، بۇل سانداردىڭ ارتىندا ەل اعالارىنىڭ كۇندەلىكتى ەڭبەگىمى، ورتاق ماقساتقا ۇمتىلۋى، قازىرگى جانە بولاشاق دامۋ ءۇشىن بەرىك ىرگەتاستى قالاعان قۇرمەتتى ارداگەرلەردىڭ قوماقتى ۇلەسى تۇر. وسىعان وراي، جەتىسۋلىقتاردىڭ ەڭبەگى بيىلعى جىلى دا ەلەۋسىز قالمادى.
تاۋەلسىزدىك كۇنىنە وراي وبلىستىڭ 70-تەن استام تۇرعىنى پرەزيدەنتتىڭ جارلىعىمەن مەملەكەتتىك ناگرادالارمەن ماراپاتتالدى. داريا كەۋدە، تاۋ ءمۇسىن ارداقتى اقساقالداردىڭ ورنى بولەك. حالقىمىزدا «اۋىلىڭدا قارت بولسا، جازىپ قويعان حاتپەن تەڭ» دەپ بەكەرگە ايتپاسا كەرەك. كوپتى كورگەن كونەكوز، ابزال جانداردىڭ جاستار تاربيەسىنە ارالاسىپ، ونەگەلى ۇرپاق تاربيەلەۋگە قوسار ۇلەسى مول. ارداقتىلاردىڭ ءومىر تاجىريبەلەرى الداعى ۋاقىتتا دا جەتىسۋ ءوڭىرى مەن ەلدىڭ دامۋىنا ىقپال ەتەتىنى ءسوزسىز. اسىل جانداردىڭ عۇمىر كولىگى ءجۇرىسىن، جۇرەك ساعاتى سوعۋىن توقتاتپاسىن. التىن قازىق اعالارىمىز، اق جاۋلىقتى انالارىمىز امان بولسىن دەگەن نيەت قانا بىزدەگى.
انار سابىروۆا، الماتى وبلىسى.
