Jıynǵa QR Prezıdenti Ákimshiliginiń memlekettik ınspektory Qýanysh Asylov qatysty. Jıynda Amandyq Batalov Joldaýda belgilengen tapsyrmalardy iske asyrýdaǵy oblystyń atqarýshy organdaryna júkteletin mindetterdi aıqyndap, tapsyrmalar berdi, - dep habarlaıdy Almaty oblysy ákiminiń baspasóz qyzmeti.
Óz baıandamasynda oblys ákimi Joldaýdaǵy ár tarmaqqa keńinen toqtalyp, sol baǵyttar boıynsha óńirde atqarylatyn isterdi atap ótti. Memlekettik qyzmettegi basymdyq qoǵammen pikir almasýǵa, ashyqtyqqa, halyqtyń talap-tilegine jedel ún qatýǵa baǵyttalýy kerektigi aıtyldy.
Sonymen qatar sybaılas jemqorlyqpen kúresti júıeli júrgizý maqsatynda Vedomstvoaralyq óńirlik komısıa jumysyn kúsheıtý mindetteldi. Sol sıaqty ıntensıvti damyǵan jáne ınklúzıvti ekonomıka jóninde de sóz qozǵaldy.
- Aldaǵy 5 jyldyqqa Indýstrıaldy-ınnovasıalyq damý memlekettik baǵdarlamasyn daıyndaǵanda ár aýdannyń óz basymdyq beretin mamandanǵan baǵyty esepke alynýy qajet. Ákimder otandyq jáne sheteldik ınvetorlardy tartý jumystaryn kúsheıtýi tıis. Joldaýda Prezıdent baǵa men tarıfterdi qalyptastyrý máselesimen júıeli túrde aınalysý týraly aıtty. Bul máselede monopolıaǵa qarsy aýmaqtyq departamentpen birlesip, TÚKSH salasyndaǵy tabıǵı monopolıalar sýbektileri tarapynan tutynýshylar qarjysynyń maqsatty paıdalanylýyna baqylaýdy kúsheıtýdi, tarıfterdiń ósýin tejeý sharalaryn qabyldaýdy tapsyramyn, - dedi A. Batalov.
Halyq tutynatyn taýarlar óndirýge baǵyttalǵan «Qarapaıym zattar ekonomıkasyn» damytý máselesi de umyt qalǵan joq.
Oblys ákiminiń aıtýynsha, osyǵan qatysty 7 joba 6,4 mlrd. teńgege bankterdiń maquldaýyn alǵan. Úkimet tarapynan bul baǵdarlamaǵa 600 mlrd. teńge bólinip otyrǵanda, aýdan, qala ákimderi baǵdarlamaǵa basymdyq berip, maquldanǵan somany áli de arttyrýǵa kúsh salýy tıis.
Shaǵyn jáne orta bıznesti damytqanda aýyldyqtarǵa turaqty jumys berip, jumyssyzdyqty azaıtyp, jergilikti búdjetti nyqtaýǵa jaǵdaı jasalady.
Bul oraıda Úkimet jańa «Bıznestiń jol kartasy» boıynsha aldaǵy úsh jylǵa qosymsha 250 mlrd. teńge bólýdi josparlap otyr. Salyqtaǵy jeńildikter, tekserýge tyıym salý da SHOB-nyń jańa tysyn ashýǵa yqpal etpek.
Osyǵan oraı oblys ákimi Amandyq Batalov aýdan, qala ákimderin otbasylyq bıznesterdiń ashylýyna, birinshi kezekte kóp balaly jáne az qamtylǵan otbasylardyń jeke is bastaýyna, ıaǵnı áleýmettik aspektilerge ekpin túsirilgen bıznesti qoldaý sharalaryn qabyldaýǵa mindettedi.
Sol sıaqty aýyl sharýashylyǵyn damytý, halyqtyń ál-aýqatyn kóterý, áleýmettik salany qoldaý sharalaryna da toqtalyp ótti. Máselen, oblysta 220 myń ga sýarmaly jerdi aınalymǵa tartý jumysy bastalǵan, onyń 39 myń gektary aǵymdaǵy jyly qalpyna keltiriledi.
Agroónerkásip kesheniniń qaıta óńdelgen ónimi eksportyn ulǵaıtý úshin transulttyq kompanıalardyń qatysýymen aldaǵy ýaqytta úsh et óńdeý keshenin iske qosý josparlanǵan.
Áleýmettik salada muǵalimder mártebesi, kóp balaly jáne az qamtylǵan otbasy balalaryna kórsetiletin qoldaýlar, ana men bala ólimin boldyrmaý, múgedek balalarǵa jasalatyn múmkindikterdi molaıtý, ataýly áleýmettik kómek sharalary jáne basqa da máselelerge keńinen toqtaldy.
- Prezıdent kezekte turǵan az qamtylǵan kóp balaly otbasylardy baspanamen qamtý máselesin úsh jyl ishinde sheshýdi tapsyrdy. Bizde olardyń sany bes myńnan asady. Bul maqsatqa 2022 jylǵa deıin 240 mlrd. teńgeden astam qarjy bólinbek.
«Baqytty otbasy» baǵdarlamasy boıynsha oblysta 657 ótinish qabyldanǵan, sonyń 286-sy maquldandy. Bıylǵy jyly barlyq baǵyt boıynsha 1447 otbasyn qamtamasyz etemiz dep josparlap otyrmyz.
Taǵy bir másele – turǵyn úı qorlaryn jóndeý men qaıta jańǵyrtý. Bul maqsatqa óńirlerge eki jylda búdjettik nesıe túrinde 30 mlrd. teńge bólinedi. Qazirgi kezde oblysta 3566 kóp páterli turǵyn úı bar, sonyń 1998-i jóndeýdi qajet etedi. Sondyqtan osy baǵdarlamanyń múmkindikterin paıdalaný kerek, - dedi A. Batalov.
Baıandama barysynda bıylǵy jyldaǵy meje ortalyqtandyrylǵan aýyz sýmen qamtýda - 91%, jaqsy jáne qanaǵattanarlyq deńgeıdegi joldyń úlesi 78% ekeni de aıtyldy. Osy jáne ózge de mindetterdi birlese atqara otyryp, oblys ekonomıkasynyń qarqyndy damýyna jáne halyqtyń ál-aýqatyn arttyrýǵa ár aýdan, qala ákimi men sala basshylary atsalysý kerektigi eskertildi.
Jaryssózge shyqqan İle aýdandyq máslıhatynyń hatshysy Roza Abılova, «Aksel A» JSHS dırektory Aıdyn Imanbekov, Bıken Rımova atyndaǵy drama teatrynyń ártisi, QR mádenıet qaıratkeri Ǵalıa Temirbaeva, Taldyqorǵan polıtehnıkalyq kolejiniń oqytýshysy Igor Skoromnyı, Panfılov aýdandyq jastar resýrstyq ortalyǵynyń mamany Almaz Batyrhan Joldaýǵa qatysty óz oı-pikirlerin bildirip, ortaq iske jumyla kirisetindikterin jetkizdi.
Almaty oblysy ákiminiń baspasóz qyzmeti
