جيىنعا ق ر پرەزيدەنتى اكىمشىلىگىنىڭ مەملەكەتتىك ينسپەكتورى قۋانىش اسىلوۆ قاتىستى. جيىندا اماندىق باتالوۆ جولداۋدا بەلگىلەنگەن تاپسىرمالاردى ىسكە اسىرۋداعى وبلىستىڭ اتقارۋشى ورگاندارىنا جۇكتەلەتىن مىندەتتەردى ايقىنداپ، تاپسىرمالار بەردى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.
ءوز بايانداماسىندا وبلىس اكىمى جولداۋداعى ءار تارماققا كەڭىنەن توقتالىپ، سول باعىتتار بويىنشا وڭىردە اتقارىلاتىن ىستەردى اتاپ ءوتتى. مەملەكەتتىك قىزمەتتەگى باسىمدىق قوعاممەن پىكىر الماسۋعا، اشىقتىققا، حالىقتىڭ تالاپ-تىلەگىنە جەدەل ءۇن قاتۋعا باعىتتالۋى كەرەكتىگى ايتىلدى.
سونىمەن قاتار سىبايلاس جەمقورلىقپەن كۇرەستى جۇيەلى جۇرگىزۋ ماقساتىندا ۆەدومستۆوارالىق وڭىرلىك كوميسسيا جۇمىسىن كۇشەيتۋ مىندەتتەلدى. سول سياقتى ينتەنسيۆتى دامىعان جانە ينكليۋزيۆتى ەكونوميكا جونىندە دە ءسوز قوزعالدى.
- الداعى 5 جىلدىققا يندۋستريالدى-يننوۆاسيالىق دامۋ مەملەكەتتىك باعدارلاماسىن دايىنداعاندا ءار اۋداننىڭ ءوز باسىمدىق بەرەتىن ماماندانعان باعىتى ەسەپكە الىنۋى قاجەت. اكىمدەر وتاندىق جانە شەتەلدىك ينۆەتورلاردى تارتۋ جۇمىستارىن كۇشەيتۋى ءتيىس. جولداۋدا پرەزيدەنت باعا مەن تاريفتەردى قالىپتاستىرۋ ماسەلەسىمەن جۇيەلى تۇردە اينالىسۋ تۋرالى ايتتى. بۇل ماسەلەدە مونوپولياعا قارسى اۋماقتىق دەپارتامەنتپەن بىرلەسىپ، تۇكش سالاسىنداعى تابيعي مونوپوليالار سۋبەكتىلەرى تاراپىنان تۇتىنۋشىلار قارجىسىنىڭ ماقساتتى پايدالانىلۋىنا باقىلاۋدى كۇشەيتۋدى، تاريفتەردىڭ ءوسۋىن تەجەۋ شارالارىن قابىلداۋدى تاپسىرامىن، - دەدى ا. باتالوۆ.
حالىق تۇتىناتىن تاۋارلار وندىرۋگە باعىتتالعان «قاراپايىم زاتتار ەكونوميكاسىن» دامىتۋ ماسەلەسى دە ۇمىت قالعان جوق.
وبلىس اكىمىنىڭ ايتۋىنشا، وسىعان قاتىستى 7 جوبا 6،4 ملرد. تەڭگەگە بانكتەردىڭ ماقۇلداۋىن العان. ۇكىمەت تاراپىنان بۇل باعدارلاماعا 600 ملرد. تەڭگە ءبولىنىپ وتىرعاندا، اۋدان، قالا اكىمدەرى باعدارلاماعا باسىمدىق بەرىپ، ماقۇلدانعان سومانى ءالى دە ارتتىرۋعا كۇش سالۋى ءتيىس.
شاعىن جانە ورتا بيزنەستى دامىتقاندا اۋىلدىقتارعا تۇراقتى جۇمىس بەرىپ، جۇمىسسىزدىقتى ازايتىپ، جەرگىلىكتى بيۋدجەتتى نىقتاۋعا جاعداي جاسالادى.
بۇل ورايدا ۇكىمەت جاڭا «بيزنەستىڭ جول كارتاسى» بويىنشا الداعى ءۇش جىلعا قوسىمشا 250 ملرد. تەڭگە ءبولۋدى جوسپارلاپ وتىر. سالىقتاعى جەڭىلدىكتەر، تەكسەرۋگە تىيىم سالۋ دا شوب-نىڭ جاڭا تىسىن اشۋعا ىقپال ەتپەك.
وسىعان وراي وبلىس اكىمى اماندىق باتالوۆ اۋدان، قالا اكىمدەرىن وتباسىلىق بيزنەستەردىڭ اشىلۋىنا، ءبىرىنشى كەزەكتە كوپ بالالى جانە از قامتىلعان وتباسىلاردىڭ جەكە ءىس باستاۋىنا، ياعني الەۋمەتتىك اسپەكتىلەرگە ەكپىن تۇسىرىلگەن بيزنەستى قولداۋ شارالارىن قابىلداۋعا مىندەتتەدى.
سول سياقتى اۋىل شارۋاشىلىعىن دامىتۋ، حالىقتىڭ ءال-اۋقاتىن كوتەرۋ، الەۋمەتتىك سالانى قولداۋ شارالارىنا دا توقتالىپ ءوتتى. ماسەلەن، وبلىستا 220 مىڭ گا سۋارمالى جەردى اينالىمعا تارتۋ جۇمىسى باستالعان، ونىڭ 39 مىڭ گەكتارى اعىمداعى جىلى قالپىنا كەلتىرىلەدى.
اگروونەركاسىپ كەشەنىنىڭ قايتا وڭدەلگەن ءونىمى ەكسپورتىن ۇلعايتۋ ءۇشىن ترانسۇلتتىق كومپانيالاردىڭ قاتىسۋىمەن الداعى ۋاقىتتا ءۇش ەت وڭدەۋ كەشەنىن ىسكە قوسۋ جوسپارلانعان.
الەۋمەتتىك سالادا مۇعالىمدەر مارتەبەسى، كوپ بالالى جانە از قامتىلعان وتباسى بالالارىنا كورسەتىلەتىن قولداۋلار، انا مەن بالا ءولىمىن بولدىرماۋ، مۇگەدەك بالالارعا جاسالاتىن مۇمكىندىكتەردى مولايتۋ، اتاۋلى الەۋمەتتىك كومەك شارالارى جانە باسقا دا ماسەلەلەرگە كەڭىنەن توقتالدى.
- پرەزيدەنت كەزەكتە تۇرعان از قامتىلعان كوپ بالالى وتباسىلاردى باسپانامەن قامتۋ ماسەلەسىن ءۇش جىل ىشىندە شەشۋدى تاپسىردى. بىزدە ولاردىڭ سانى بەس مىڭنان اسادى. بۇل ماقساتقا 2022 جىلعا دەيىن 240 ملرد. تەڭگەدەن استام قارجى بولىنبەك.
«باقىتتى وتباسى» باعدارلاماسى بويىنشا وبلىستا 657 ءوتىنىش قابىلدانعان، سونىڭ 286-سى ماقۇلداندى. بيىلعى جىلى بارلىق باعىت بويىنشا 1447 وتباسىن قامتاماسىز ەتەمىز دەپ جوسپارلاپ وتىرمىز.
تاعى ءبىر ماسەلە – تۇرعىن ءۇي قورلارىن جوندەۋ مەن قايتا جاڭعىرتۋ. بۇل ماقساتقا وڭىرلەرگە ەكى جىلدا بيۋدجەتتىك نەسيە تۇرىندە 30 ملرد. تەڭگە بولىنەدى. قازىرگى كەزدە وبلىستا 3566 كوپ پاتەرلى تۇرعىن ءۇي بار، سونىڭ 1998ء-ى جوندەۋدى قاجەت ەتەدى. سوندىقتان وسى باعدارلامانىڭ مۇمكىندىكتەرىن پايدالانۋ كەرەك، - دەدى ا. باتالوۆ.
بايانداما بارىسىندا بيىلعى جىلداعى مەجە ورتالىقتاندىرىلعان اۋىز سۋمەن قامتۋدا - 91%، جاقسى جانە قاناعاتتانارلىق دەڭگەيدەگى جولدىڭ ۇلەسى 78% ەكەنى دە ايتىلدى. وسى جانە وزگە دە مىندەتتەردى بىرلەسە اتقارا وتىرىپ، وبلىس ەكونوميكاسىنىڭ قارقىندى دامۋىنا جانە حالىقتىڭ ءال-اۋقاتىن ارتتىرۋعا ءار اۋدان، قالا اكىمى مەن سالا باسشىلارى اتسالىسۋ كەرەكتىگى ەسكەرتىلدى.
جارىسسوزگە شىققان ىلە اۋداندىق ءماسليحاتىنىڭ حاتشىسى روزا ابيلوۆا، «اكسەل ا» ج ش س ديرەكتورى ايدىن يمانبەكوۆ، بيكەن ريموۆا اتىنداعى دراما تەاترىنىڭ ءارتىسى، ق ر مادەنيەت قايراتكەرى عاليا تەمىربايەۆا، تالدىقورعان پوليتەحنيكالىق كوللەدجىنىڭ وقىتۋشىسى يگور سكورومنىي، پانفيلوۆ اۋداندىق جاستار رەسۋرستىق ورتالىعىنىڭ مامانى الماز باتىرحان جولداۋعا قاتىستى ءوز وي-پىكىرلەرىن ءبىلدىرىپ، ورتاق ىسكە جۇمىلا كىرىسەتىندىكتەرىن جەتكىزدى.
الماتى وبلىسى اكىمىنىڭ باسپا ءسوز قىزمەتى
