«AMANAT» mobıldi qoǵamdyq qabyldaý bólmeleriniń jumys sapary jalǵasyp jatyr. Búgin partıa músheleri Pavlodar jáne Túrkistan oblystaryna bardy. Bir kúnde shalǵaıdaǵy 4 eldi meken qamtylyp, qabyldaýǵa 100-ge jýyq azamat keldi, – dep habarlaıdy Dalanews.kz.

Memleket basshysy Qasym-Jomart Toqaev «AMANAT» partıasynyń kezekten tys HHİİ Sezinde partıa jumysyn qaıta qurýdy tapsyryp, qoǵamdyq qabyldaý bólmeleri azamattar úshin tartymdy orynǵa aınalýy tıis ekenin atap ótken bolatyn. Qoǵamdyq qabyldaý bólmeleri adamdar tek shaǵym arqalap emes, eldi damytýǵa qatysty naqty usynysymen keletin oryn bolýy qajet.

Máselen, Pavlodar oblysy Baıanaýyl aýdany Uzynbulaq aýylynyń fermerleri aýyl sharýashylyǵy taýaryn óndirýshilerge beriletin nesıe qoljetimdiligin keńeıtýdi jáne tehnıka satyp alýǵa negizdelgen sýbsıdıa kólemin ulǵaıtýdy surap otyr. Sondaı-aq, sharýa qojalyqtary shóp shabatyn maýsymdaǵy janarmaı qymbatshylyǵyna nazar aýdardy.