«AMANAT» ءموبيلدى قوعامدىق قابىلداۋ بولمەلەرىنىڭ جۇمىس ساپارى جالعاسىپ جاتىر. بۇگىن پارتيا مۇشەلەرى پاۆلودار جانە تۇركىستان وبلىستارىنا باردى. ءبىر كۇندە شالعايداعى 4 ەلدى مەكەن قامتىلىپ، قابىلداۋعا 100-گە جۋىق ازامات كەلدى، – دەپ حابارلايدى Dalanews.kz.

مەملەكەت باسشىسى قاسىم-جومارت توقايەۆ «AMANAT» پارتياسىنىڭ كەزەكتەن تىس ءححىى سەزىندە پارتيا جۇمىسىن قايتا قۇرۋدى تاپسىرىپ، قوعامدىق قابىلداۋ بولمەلەرى ازاماتتار ءۇشىن تارتىمدى ورىنعا اينالۋى ءتيىس ەكەنىن اتاپ وتكەن بولاتىن. قوعامدىق قابىلداۋ بولمەلەرى ادامدار تەك شاعىم ارقالاپ ەمەس، ەلدى دامىتۋعا قاتىستى ناقتى ۇسىنىسىمەن كەلەتىن ورىن بولۋى قاجەت.

ماسەلەن، پاۆلودار وبلىسى باياناۋىل اۋدانى ۇزىنبۇلاق اۋىلىنىڭ فەرمەرلەرى اۋىل شارۋاشىلىعى تاۋارىن وندىرۋشىلەرگە بەرىلەتىن نەسيە قولجەتىمدىلىگىن كەڭەيتۋدى جانە تەحنيكا ساتىپ الۋعا نەگىزدەلگەن سۋبسيديا كولەمىن ۇلعايتۋدى سۇراپ وتىر. سونداي-اق، شارۋا قوجالىقتارى ءشوپ شاباتىن ماۋسىمداعى جانارماي قىمباتشىلىعىنا نازار اۋداردى.