Qaraǵandyda Áliia Nazarbaevaǵa tiesili bolǵan qaldyqtardy óndeý zaýyty 1,5 milliard teńgege satyldy, - dep habarlaidy Dalanews.kz Orda.kz-ke siltep.
Zaýyt 2 mamyrda satylymǵa shyqqan. "Recycling Company" JShS múlkin ielený quqyǵyna saýda-sattyq júrgizilgen. Satýshy – Qaraǵandy memlekettik múlik jáne jekeshelendirý departamenti.
Ǵimarat 2017 jyly qoldanysqa berilgen. Al 2019 jyly zaýytqa oq-dáriler men áskeri tehnika shyǵarýǵa litsenziiasy berilgen.
Zaýyttyń aýmaǵy 14,7 sharshy shaqyrym.
Zaýytta ákimshilik ǵimarat, garaj, qoima, piroliz jáne balqytý tsehy, TJO jáne óndiristik ǵimarat bar. Ǵimarattaǵy kólikter, vagondar men krandardy qosa alǵanda onyń naryqtyq quny 4,1 milliard teńge dep baǵalanǵan. Sonymen qatar, JShS-niń jarǵylyq kapitaly 1,7 million teńge bolǵan. Biraq zaýyt 1,5 milliard teńgege satylǵan.
Qarjy ministrliginiń málimetinshe, JShS emes, ondaǵy múlikter ǵana satylǵan.
"Bizge bul mekeme jumys istep turǵan ǵimarat retinde emes, múlik retinde keldi. Kásiporynda aktsionerlik múlik bolady. Al ol bizge tárkilengen múlik retinde keldi. Iaǵni adam qandai da bir qylmys jasasa múlki tárkilenedi ǵoi, bul da dál sondai jaǵdai", - deidi qarjy vitse-ministri Dáýren Temirbekov Májilis kýlýarynda.
Biraq kásiporynnyń qansha turatynyn baǵalaý kezindegi esepte ol jumys istep turǵan ǵimarat retinde kórsetilgen eken.
Aita keteiik, bul zaýyt 2017 jyly ashylǵan. Onyń ashylý saltanatyna eks-prezident Nursultan Nazarbaev ta qatysqan. Bul Ortalyq Aziiada ashylǵan alǵashqy kompaniia. Zaýytta syǵylǵan briketterdi shoiyn, bolat, aliýminii jáne tústi qorytpalarǵa ainaldyrylatyn. Ol kezde kompaniiadaǵy bas direktor Aleksandr Riabinin bolatyn.
Keiinnen zaýytty eks-prezidenttiń kishi qyzy Áliia Nazarbaeva bar bolǵany 1,7 million teńgege satyp alǵan.
Eske salaiyq, buǵan deiin Áliia Nazarbaeva kúzetti kúsheitip, Qaraǵandydaǵy aktivin bermei qoiǵanyn jazǵan edik. Qaraǵandy oblysyndaǵy "Recycling Sompany" JShS zaýytynda múlikti túgendeý kerek bolǵan sot oryndaýshylary kásiporynǵa kire almai qoiǵan. Áliia Nazarbaevaǵa qatysy bar "ÓKM operatorynyń" isi boiynsha bul zaýyt memleket paidasyna tárkilenýi kerek bolǵan.
Qoǵam belsendisi Jarqyn Kúrentaevtyń sózinshe, 2023 jylǵy shildede Astana soty shyǵarǵan ÓKM operatorynyń top-menedjerlerine qatysty úkimge sáikes, "Recycling Company" JShS esepshotyndaǵy qarajat, sondai-aq kásiporynnyń ózi memleket paidasyna tárkilengen. Zaýyt Qaraǵandy oblysyndaǵy Doskei aýylynda ornalasqan jáne eski kólikterdi qaita óńdeýmen ainalysady.
Biyl aqpannyń sońynda kompaniiaǵa qatysty atqarýshylyq óndiris bastaldy. Sot oryndaýshylary kásiporynǵa túgendeý jumystaryn júrgizý úshin kelgenimen, olardyń zaýytqa kirýine birneshe kún buryn kúzetshiler kedergi keltirgen.
"Memlekettik sot oryndaýshylary múlikti túgendeý jáne sot úkiminde kózdelgen basqa da qajetti qyzmetti júzege asyrý úshin zaýytqa kire almaǵan. Olardyń aitýynsha, Áliia Nazarbaeva hanym zaýytta qaýipsizdikti kúsheitken. Al olardyń zańdy talaptaryna qaramastan, kúzetshiler olardy ishke kirgizbei qoidy. Osydan keiin sot oryndaýshylary prokýratýramen aldaǵy is-áreketterin anyqtaý úshin Qaraǵandyǵa oraldy. Prokýratýra ókili jaǵdaidy qarap shyǵýǵa ýáde berdi", - deidi Jarqyn Kúrentaev Orda.kz-ke.
Kúrentaevtyń aitýynsha, zaýytty tárkileýge naqty kim kedergi keltirgeni belgisiz. Biraq kelesi joly sot oryndaýshylar kásiporynǵa SOBR sarbazdarymen birge barmaq - prokýratýra sot oryndaýshylaryna qoldaý kórsetýge ýáde bergen. Kompaniianyń múlkin tárkileý sharalary keiinge qaldyrylyp, endi 1 nemese 4 naýryzda ótedi dep josparlanyp otyr.
