قاراعاندىدا ءاليا نازاربايەۆاعا تيەسىلى بولعان قالدىقتاردى وندەۋ زاۋىتى 1،5 ميلليارد تەڭگەگە ساتىلدى، - دەپ حابارلايدى Dalanews.kz Orda.kz-كە سىلتەپ.
زاۋىت 2 مامىردا ساتىلىمعا شىققان. "Recycling Company" ج ش س مۇلكىن يەلەنۋ قۇقىعىنا ساۋدا-ساتتىق جۇرگىزىلگەن. ساتۋشى – قاراعاندى مەملەكەتتىك مۇلىك جانە جەكەشەلەندىرۋ دەپارتامەنتى.
عيمارات 2017 جىلى قولدانىسقا بەرىلگەن. ال 2019 جىلى زاۋىتقا وق-دارىلەر مەن اسكەري تەحنيكا شىعارۋعا ليسەنزياسى بەرىلگەن.
زاۋىتتىڭ اۋماعى 14،7 شارشى شاقىرىم.
زاۋىتتا اكىمشىلىك عيمارات، گاراج، قويما، پيروليز جانە بالقىتۋ سەحى، تجو جانە وندىرىستىك عيمارات بار. عيماراتتاعى كولىكتەر، ۆاگوندار مەن كرانداردى قوسا العاندا ونىڭ نارىقتىق قۇنى 4،1 ميلليارد تەڭگە دەپ باعالانعان. سونىمەن قاتار، ءجشس-نىڭ جارعىلىق كاپيتالى 1،7 ميلليون تەڭگە بولعان. ءبىراق زاۋىت 1،5 ميلليارد تەڭگەگە ساتىلعان.
قارجى مينيسترلىگىنىڭ مالىمەتىنشە، ج ش س ەمەس، ونداعى مۇلىكتەر عانا ساتىلعان.
"بىزگە بۇل مەكەمە جۇمىس ىستەپ تۇرعان عيمارات رەتىندە ەمەس، مۇلىك رەتىندە كەلدى. كاسىپورىندا اكسيونەرلىك مۇلىك بولادى. ال ول بىزگە تاركىلەنگەن مۇلىك رەتىندە كەلدى. ياعني ادام قانداي دا ءبىر قىلمىس جاساسا مۇلكى تاركىلەنەدى عوي، بۇل دا ءدال سونداي جاعداي"، - دەيدى قارجى ۆيسە-مينيسترى داۋرەن تەمىربەكوۆ ءماجىلىس كۋلۋارىندا.
ءبىراق كاسىپورىننىڭ قانشا تۇراتىنىن باعالاۋ كەزىندەگى ەسەپتە ول جۇمىس ىستەپ تۇرعان عيمارات رەتىندە كورسەتىلگەن ەكەن.
ايتا كەتەيىك، بۇل زاۋىت 2017 جىلى اشىلعان. ونىڭ اشىلۋ سالتاناتىنا ەكس-پرەزيدەنت نۇرسۇلتان نازاربايەۆ تا قاتىسقان. بۇل ورتالىق ازيادا اشىلعان العاشقى كومپانيا. زاۋىتتا سىعىلعان بريكەتتەردى شويىن، بولات، اليۋمينيي جانە ءتۇستى قورىتپالارعا اينالدىرىلاتىن. ول كەزدە كومپانياداعى باس ديرەكتور الەكساندر ريابينين بولاتىن.
كەيىننەن زاۋىتتى ەكس-پرەزيدەنتتىڭ كىشى قىزى ءاليا نازاربايەۆا بار بولعانى 1،7 ميلليون تەڭگەگە ساتىپ العان.
ەسكە سالايىق، بۇعان دەيىن ءاليا نازاربايەۆا كۇزەتتى كۇشەيتىپ، قاراعاندىداعى اكتيۆىن بەرمەي قويعانىن جازعان ەدىك. قاراعاندى وبلىسىنداعى "Recycling سompany" ج ش س زاۋىتىندا مۇلىكتى تۇگەندەۋ كەرەك بولعان سوت ورىنداۋشىلارى كاسىپورىنعا كىرە الماي قويعان. ءاليا نازاربايەۆاعا قاتىسى بار "وكم وپەراتورىنىڭ" ءىسى بويىنشا بۇل زاۋىت مەملەكەت پايداسىنا تاركىلەنۋى كەرەك بولعان.
قوعام بەلسەندىسى جارقىن كۇرەنتايەۆتىڭ سوزىنشە، 2023 جىلعى شىلدەدە استانا سوتى شىعارعان وكم وپەراتورىنىڭ توپ-مەنەدجەرلەرىنە قاتىستى ۇكىمگە سايكەس، "Recycling Company" ج ش س ەسەپشوتىنداعى قاراجات، سونداي-اق كاسىپورىننىڭ ءوزى مەملەكەت پايداسىنا تاركىلەنگەن. زاۋىت قاراعاندى وبلىسىنداعى دوسكەي اۋىلىندا ورنالاسقان جانە ەسكى كولىكتەردى قايتا وڭدەۋمەن اينالىسادى.
بيىل اقپاننىڭ سوڭىندا كومپانياعا قاتىستى اتقارۋشىلىق ءوندىرىس باستالدى. سوت ورىنداۋشىلارى كاسىپورىنعا تۇگەندەۋ جۇمىستارىن جۇرگىزۋ ءۇشىن كەلگەنىمەن، ولاردىڭ زاۋىتقا كىرۋىنە بىرنەشە كۇن بۇرىن كۇزەتشىلەر كەدەرگى كەلتىرگەن.
"مەملەكەتتىك سوت ورىنداۋشىلارى مۇلىكتى تۇگەندەۋ جانە سوت ۇكىمىندە كوزدەلگەن باسقا دا قاجەتتى قىزمەتتى جۇزەگە اسىرۋ ءۇشىن زاۋىتقا كىرە الماعان. ولاردىڭ ايتۋىنشا، ءاليا نازاربايەۆا حانىم زاۋىتتا قاۋىپسىزدىكتى كۇشەيتكەن. ال ولاردىڭ زاڭدى تالاپتارىنا قاراماستان، كۇزەتشىلەر ولاردى ىشكە كىرگىزبەي قويدى. وسىدان كەيىن سوت ورىنداۋشىلارى پروكۋراتۋرامەن الداعى ىس-ارەكەتتەرىن انىقتاۋ ءۇشىن قاراعاندىعا ورالدى. پروكۋراتۋرا وكىلى جاعدايدى قاراپ شىعۋعا ۋادە بەردى"، - دەيدى جارقىن كۇرەنتايەۆ Orda.kz-كە.
كۇرەنتايەۆتىڭ ايتۋىنشا، زاۋىتتى تاركىلەۋگە ناقتى كىم كەدەرگى كەلتىرگەنى بەلگىسىز. ءبىراق كەلەسى جولى سوت ورىنداۋشىلار كاسىپورىنعا سوبر ساربازدارىمەن بىرگە بارماق - پروكۋراتۋرا سوت ورىنداۋشىلارىنا قولداۋ كورسەتۋگە ۋادە بەرگەن. كومپانيانىڭ مۇلكىن تاركىلەۋ شارالارى كەيىنگە قالدىرىلىپ، ەندى 1 نەمەسە 4 ناۋرىزدا وتەدى دەپ جوسپارلانىپ وتىر.
