Astanada áýejaidyń ekinshi ushý-qoný jolaǵyn salý jáne infraqurylymyn damytý úshin 57 jer ýchaskesi májbúrli túrde memleket muqtajyna alynady, dep habarlaidy dalanews.kz.
Astana qalasy ákimdigi tiisti qaýly qabyldady. Qujat «Vecherniaia Astana» gazetinde jariialanǵan.
Qaýlyǵa tirkelgen tizimde Qabanbai batyr dańǵyly, áýejai aýmaǵy jáne Esil aýdany mańynda ornalasqan 57 jer ýchaskesi kórsetilgen. Olardyń ieleri qatarynda Astana áýejaiy, «Qaztsink», SCAT, Air Astana, «Qazavianavigatsiia» kompaniialary jáne basqa da uiymdar bar. Sondai-aq tizimge bir jeke tulǵaǵa tiesili jer telimi engizilgen.
Jer ýchaskelerin májbúrlep ielikten shyǵarý rásimi 2027 jylǵy 1 aqpan men 2028 jylǵy 1 aqpan aralyǵynda júrgiziledi.
Memlekettik organdar qaýly jariialanǵannan keiin úsh kúntizbelik kún ishinde jer ieleri men jer paidalanýshylardy habardar etýge tiis. Habarlama alǵan azamattar men uiymdarǵa kelisý rásimin bastaý úshin 15 kúntizbelik kún beriledi.
Aita keteiik, áýejaidyń ekinshi ushý-qoný jolaǵyn salý elordanyń áýe infraqurylymyn jańǵyrtý jobasynyń bir bóligi sanalady. 2026 jylǵy aqpanda Premer-ministr Oljas Bektenov qurylysty biyl bastaý josparlanǵanyn málimdegen edi.
Úkimet basshysynyń aitýynsha, ekinshi jolaq paidalanýǵa berilgennen keiin áýejaidyń jolaýshylar ótkizý múmkindigi jylyna 40 million adamǵa deiin artýy múmkin.
