Ázerbaıjan prezıdenti Ilham Álıev Aqtaýda qulaǵan ushaq "jerden atylǵan oqtyń saldarynan" zaqymdanǵanyn málimdedi. Onyń aıtýynsha, Baký Máskeýden kinálilerdi jazalaýdy jáne ótemaqy tóleýdi talap etedi. Bul týraly ol Ázerbaıjan telearnasyna bergen suhbatynda aıtty, - dep habarlaıdy Dalanews.kz.
Prezıdenttiń sózine qaraǵanda, apattyń sońǵy nusqasy qara jáshikter ashylǵannan keıin belgili bolady. Biraq ushaqtyń «Reseı aýmaǵynda syrttan zaqymdalǵany» anyq fakt. Tek ushqyshtardyń sheberliginiń arqasynda ushaqtyń fúzelájynyń bir bóligi órtenbeı qalǵan, bul «ushaqtyń Reseı tarapynan atyp túsirilgenin» kórsetedi, dedi Álıev.
Ol ushaqtyń «qasaqana emes, baıqaýsyzda» atylǵanyn atap ótti.
«Bizdiń ashýymyzǵa tıgen ári tańǵaldyrǵan jaıttardyń biri – reseılik resmı qurylymdardyń qandaı da bir gaz balonynyń jarylysy týraly nusqalardy usynýy boldy. Bul Reseı tarapynyń isti jabýǵa tyrysyp jatqanyn ashyq kórsetti jáne, árıne, bul eshkimge abyroı ákelmeıdi», – dep keltiredi Ázerbaıjan kóshbasshysynyń sózin AZERTADJ.
27 jeltoqsanda Ázerbaıjan Reseıge birneshe talap qoıǵan bolatyn:
•keshirim surap, kináni moıyndaý;
•barlyq kinálilerdi jazalaý;
•Ázerbaıjan memleketine, zardap shekken jolaýshylar men ekıpaj múshelerine ótemaqy tóleý.
«Bul talaptardyń barlyǵy ádil. Munda erekshe nemese orynsyz talaptar joq, bul halyqaralyq tájirıbege jáne qalypty adamı qaǵıdalarǵa negizdelgen», – dep túsindirdi Álıev.
