ازەربايجان پرەزيدەنتى يلحام الييەۆ اقتاۋدا قۇلاعان ۇشاق "جەردەن اتىلعان وقتىڭ سالدارىنان" زاقىمدانعانىن مالىمدەدى. ونىڭ ايتۋىنشا، باكۋ ماسكەۋدەن كىنالىلەردى جازالاۋدى جانە وتەماقى تولەۋدى تالاپ ەتەدى. بۇل تۋرالى ول ازەربايجان تەلەارناسىنا بەرگەن سۇحباتىندا ايتتى، - دەپ حابارلايدى Dalanews.kz.
پرەزيدەنتتىڭ سوزىنە قاراعاندا، اپاتتىڭ سوڭعى نۇسقاسى قارا جاشىكتەر اشىلعاننان كەيىن بەلگىلى بولادى. ءبىراق ۇشاقتىڭ «رەسەي اۋماعىندا سىرتتان زاقىمدالعانى» انىق فاكت. تەك ۇشقىشتاردىڭ شەبەرلىگىنىڭ ارقاسىندا ۇشاقتىڭ فيۋزەلياجىنىڭ ءبىر بولىگى ورتەنبەي قالعان، بۇل «ۇشاقتىڭ رەسەي تاراپىنان اتىپ تۇسىرىلگەنىن» كورسەتەدى، دەدى الييەۆ.
ول ۇشاقتىڭ «قاساقانا ەمەس، بايقاۋسىزدا» اتىلعانىن اتاپ ءوتتى.
«ءبىزدىڭ اشۋىمىزعا تيگەن ءارى تاڭعالدىرعان جايتتاردىڭ ءبىرى – رەسەيلىك رەسمي قۇرىلىمداردىڭ قانداي دا ءبىر گاز باللونىنىڭ جارىلىسى تۋرالى نۇسقالاردى ۇسىنۋى بولدى. بۇل رەسەي تاراپىنىڭ ءىستى جابۋعا تىرىسىپ جاتقانىن اشىق كورسەتتى جانە، ارينە، بۇل ەشكىمگە ابىروي اكەلمەيدى»، – دەپ كەلتىرەدى ازەربايجان كوشباسشىسىنىڭ ءسوزىن ازەرتادج.
27 جەلتوقساندا ازەربايجان رەسەيگە بىرنەشە تالاپ قويعان بولاتىن:
•كەشىرىم سۇراپ، كىنانى مويىنداۋ؛
•بارلىق كىنالىلەردى جازالاۋ؛
•ازەربايجان مەملەكەتىنە، زارداپ شەككەن جولاۋشىلار مەن ەكيپاج مۇشەلەرىنە وتەماقى تولەۋ.
«بۇل تالاپتاردىڭ بارلىعى ءادىل. مۇندا ەرەكشە نەمەسە ورىنسىز تالاپتار جوق، بۇل حالىقارالىق تاجىريبەگە جانە قالىپتى ادامي قاعيدالارعا نەگىزدەلگەن»، – دەپ ءتۇسىندىردى الييەۆ.
