Tanymal saiasatker ári kásipker Bolat Ábilov marqum memleket qairatkeri Altynbek Sársenbaevty eske alyp, onyń qaza tapqanyna 20 jyl tolǵanyna nazar aýdardy, dep habarlaidy Dalanews.kz.
Ol atalǵan qylmystyń áli kúnge deiin tolyq ashylmai otyrǵanyn aityp, Qazaqstannyń jańa tarihyndaǵy birqatar qasiretti kezeńderge toqtaldy.
Ábilovtiń jazýynsha, el tarihyndaǵy eń aýyr ári qaiǵyly oqiǵalardyń kóbi kúzdiń sońy men qys ailaryna tuspa-tus keledi. Máselen, 2005 jyldyń qarashasynda memleket jáne qoǵam qairatkeri Zamanbek Nurqadilov óz úiinde qastandyqpen óltirildi. Alaida arada qansha jyl ótse de, bul qylmysty jasaǵandar da, tapsyrys bergender de anyqtalǵan joq. Jeltoqsan aiy da el jadynda qaraly kezeń retinde saqtalǵan: 1986 jylǵy Jeltoqsan kóterilisi, 2011 jylǵy 16–17 jeltoqsandaǵy Jańaózen oqiǵasy. Qańtar men aqpan ailary da qandy tragediialarmen bailanysty - sonyń biri 2022 jylǵy Qańtar oqiǵasy. Al 2006 jyldyń aqpanynda oppozitsiialyq saiasatker, «Aq jol» partiiasynyń teń tóraǵasy Altynbek Sársenbaev kómekshisi Baýyrjan Bekbosynov jáne júrgizýshisi Vasilii Jýravliovpen birge qastandyq qurbany boldy.
Bolat Ábilovtiń aitýynsha, Sársenbaevtyń qazasy arada jiyrma jyl ótse de, el jadynan óshken joq.
«Altynbektiń ómirden ótkenine 20 jyl toldy. Biraq bul qaiǵyly jaǵdai keshe ǵana bolǵandai áser qaldyrady. Sanadan ketpeitin bir suraq bar: ol ne úshin óltirildi?» – deidi ol.
Ábilov Sársenbaevtyń sol kezdegi saiasi ahýalǵa qatysty batyl ári ashyq ustanymda bolǵanyn da eske aldy. Onyń aitýynsha, Altynbek Sársenbaev Rahat Álievtiń sol kezdegi prezident Nursultan Nazarbaevqa qarsy qastandyq josparlap júrgenin dáleldeitin materialdardy jinaǵan. Marat Tájinmen birge olar bul aqparatty tikelei prezidentke jetkizgen. Sol sát Nazarbaevtyń qatty abdyrap, ózin-ózi ustai almai qalǵanyn, al Altynbek pen Tájin oǵan kómekteskenin Ábilov óz jazbasynda atap ótedi. Osy kezdesýde Sársenbaev Rahat Álievti jáne onyń ainalasyndaǵylardy bilikten shettetip, qamaýǵa alý qajet ekenin usynǵan.
Bolat Ábilov bul oqiǵa Altynbek Sársenbaevtyń taǵdyryna tikelei áser etken bolýy múmkin degen pikirde.
«Múmkin, dál osy jaǵdai Altynbektiń kózin joiýǵa sebep bolǵan shyǵar. Óitkeni ol memleket basshysynyń álsizdigin, qorqynyshyn kórdi. Árine, bizge beimálim nemese tek joramal deńgeiinde ǵana qalatyn ózge de sebepter bolýy múmkin. Biraq bir nárse anyq: Altynbek eshqashan radikal bolǵan joq, zorlyq-zombylyqqa nemese tóńkeriske shaqyrǵan emes. Sondyqtan “nege?” degen suraq áli de jaýapsyz. 20 jyl ótse de, bul qylmystyń tapsyrys berýshileri anyqtalmady, jazalanǵan joq. Bul – Qazaqstannyń jańa tarihyndaǵy eń úreili, eń qupiia saiasi qastandyqtardyń biri. Bolashaǵy zor saiasatkerdi, shynaiy saiasi básekelesti joiý kimge tiimdi bolǵanyn jáne bul qylmystyń izi qaida aparatynyn kópshilik ishtei túsinedi. Altynbek Sársenbaevtyń ólimi ulttyq tragediiaǵa, orny tolmas aýyr shyǵynǵa ainaldy. Osy jiyrma jyl boiy elge Altynbek qatty jetispeidi…» – dep túiindedi Bolat Ábilov.
