– Qaladaǵy eldi mekenderdi aralaýdy jalǵastyramyz. Ózderińiz biletindei, bizde olardyń sany – 16. Onda turatyn halyqtyń sany – 300 myńǵa jýyq adam. Bul – elordanyń árbir tórtinshi turǵyny eldi mekende turady degen sóz.
Eldi mekeni turǵyndarymen kezdesýde eń birinshi kezekte atqarylýy qajet jumystar týraly áńgimelesip, pikir almastyq. Máselen, turǵyndar jol, trotýar, skverler/býlvarlar, balalar men sport alańdaryn salý jáne jaryqtandyrý syndy máseleler týraly óz oilarymen bólisti. Aitylǵan máselelerdi nazarǵa alyp, osy eldi mekenniń aldaǵy damý josparyna engizemiz.
Jaqynda Kóktal-1 eldi mekenin tutastai gazben qamtamasyz ettik. Sonymen qatar biyl №40 mektep-litsei aýmaǵynda eki aýysymda 1 myń oryndy qamtityn taǵy bir oqý orny salyndy. Osylaisha mektepke túsetin júkteme azaiyp, jańa oqýshy oryndary ashylady. Soǵan qosa, osy eldi mekende qalalyqtardyń taza aýada salaýatty ómir saltyn saqtai otyryp, jaily jaǵdaida ýaqytyn paidaly ótkizýine múmkindik beretin taǵy 2 qoǵamdyq keńistik salamyz (Aqtolqyn kóshesi, Bastańǵy qiylysy).
Ótken jyly eldi mekende birinshi ret saiabaq salyndy. Onyń aýqymy – 15 gektar. Salystyrmaly túrde aitsaq, bul saiabaq bizdiń qaladaǵy saiabaqtardan 2 ese úlken. Kóktaldaǵy jańa sabiaqta basketbol, fýtbol alańdary men vorkaýt-aimaqtar, tynysh demalýǵa jáne itterdi serýendetýge arnalǵan aimaqtar bar.
Memleket basshysy eldi mekenderdi damytýǵa erekshe kóńil aýdarady. Sondyqtan barlyq eldi mekenderdi damytý baǵytynda jumys júrgizýdemiz.
Aitalyq, byltyr shet aimaqtarda 100 kóshe, 345 shaqyrym gaz taratý jelilerin júrgizdik. Úsh eldi meken turǵyndary gazǵa qosylýǵa múmkindik aldy. Jańa jylytý maýsymynda taǵy 7 eldi meken gazǵa kóshiriledi.
Buǵan qosa, 13,5 shaqyrym injenerlik jeli, 5 shaqyrymnan astam káriz jelisi jáne sý qubyryn tarttyq, 3 shaqyrymnan astam nóser kárizderi salyndy.
Ótken jyly 40 qoǵamdyq keńistikti bos jatqan tyń jerine parkter, skverler, býlvarlar salyndy (Kóktal-1, Kóktal-2, Agrogorodok, Internatsionalnyi, Óndiris jáne t. b.).
Óndiris, Kóktal, Ilinka, Jeleznodorojnyi eldi mekenderinde dene shynyqtyrý jáne saýyqtyrý keshenderiniń qurylysyn júrgizýdemiz. Ol oryndarda sportpen ainalysýǵa arnalǵan alańdardan bólek, egde jastaǵy adamdardyń qyzyǵýshylyǵy boiynsha klýbtar, HQO, politsiia, poshta bólimsheleri ornalasady. Atalǵan keshenderge turǵyndar tegin barady. Olardy biyl ashýdy josparlap otyrmyz.
Aldaǵy jyldary Nur Otan partiiasynyń sailaýaldy baǵdarlamasyna sáikes taǵy 130 shaqyrym sýmen jabdyqtaý jáne sý burý jelilerin, 85 shaqyrym nóser kárizin, qosalqy stansa men 177 shaqyrym elektrmen jabdyqtaý jelilerin, 23 shaqyrym jylýmen jabdyqtaý jelilerin, 3 keshen nóser kárizderin tazartý qurylystaryn salamyz.
Osylaisha, buǵan deiin aitqanymdai, bizdiń maqsatymyz – shet aimaqtardy shaǵyn aýdandarǵa ainaldyrý. Bul shaǵyn aýdandardyń taza aýada demalýǵa arnalǵan oryndary, áleýmettik nysandary, jaily ómir súrý úshin qolaily infraqurylymdar bolady, – dep jazdy elorda ákimi.
