Aimaq basshysynyń sapary oblys biýdjeti esebinen aýdan ortalyǵynda salynyp jatqan dene shynyqtyrý-saýyqtyrý keshenin aralaýdan bastaldy. Munda jekpe-jek, jeńil atletika, oiyn sport túrlerimen ainalysýǵa arnalǵan zaldar qarastyrylǵan. Sondai-aq, barlyq halyqaralyq standarttarǵa sai keletin fýtbol alańy men 400 metrlik tórt júgirý alańy bolady.
Budan keiin oblys ákimi Pobeda kóshesindegi eki jeke turǵyn úidiń jáne Á.Moldaǵulova kóshesindegi úsh úi qurylysynyń barysymen tanysty. Turǵyn úilerdi «Bir qabatty Shyǵys» baǵdarlamasy aiasynda jergilikti qurylys kompaniiasy salýda.
Bir úidiń jalpy aýdany 89,9 sharshy metrdi quraidy. Biyl qyrkúiek-qazan ailarynda paidalanýǵa beriledi. Eń birinshi onda kópbalaly otbasylar qonystanady. Sodan keiin dárigerlerdiń, muǵalimderdiń, mádeniet qyzmetkerleri men balalar úii túlekteriniń baspana máselesi sheshiledi. Osy maqsatta aýdan ákimdigi burynǵy tigin fabrikasynyń jataqhana ǵimaratyn satyp alynǵan. Eki bólmeli 40 páter jóndelý ústinde. Osylaisha, óńirde maman tapshylyǵy máselesi sheshiledi.
Sonymen qatar, ákim burynǵy Serebriansk beiorganikalyq óndiris zaýytynyń ákimshilik ǵimaratyn jóndeý jumystarymen tanysty. Birinshi qabatta jumyspen qamtýdy úilestirý jáne áleýmettik baǵdarlamalar basqarmasynyń filialy jumys isteitin bolady.
Ekinshi jáne úshinshi qabattarǵa úiirmeler, shyǵarmashylyq stýdiialar jáne mýzyka mektebi ornalasady. 4-5 qabat sport sektsiialaryna beriledi. Sondai-aq, birinshi qabattaǵy kontsert zalyn qalpyna keltirý josparlanyp otyr.
– Aldaǵy ýaqytta qala turǵyndary jańa mádeni-sport nysanyna ie bolady. Bul óte qajet. Óitkeni, tek mýzyka mektebiniń ózinde 350 bala oqidy. Qalada qanshama shyǵarmashylyq toptar bar. Serebriansk qalasyn abattandyrý jumystaryn jalǵastyra beremiz. Ótken jyly joldar jóndeldi, jylýmen qamtamasyz etýdiń barlyq máseleleri sheshildi. Qalanyń turǵyn úi jáne basqa da áleýmettik mańyzǵa ie máselelerin sheshý meniń turaqty baqylaýymda, – dedi Danial Ahmetov.
