Almaty qalasy ákiminiń orynbasary Abzal Núkenovtiń tóraǵalyǵymen Memlekettik rámizder jónindegi komissiianyń kezekti otyrysy ótti. Jiynda Qazaqstan Respýblikasynyń Memlekettik rámizderi kúnin merekeleýge daiyndyq barysy, memlekettik rámizderdiń qoldanylýyna júrgizilgen monitoring nátijeleri jáne olardy keńinen nasihattaý máseleleri qaraldy, dep habarlaidy dalanews.kz.
Otyrys barysynda memlekettik rámizderdiń el táýelsizdigi men memlekettiliginiń mańyzdy nyshandary ekeni atap ótildi. Memlekettik Tý, Eltańba jáne Ánurannyń mártebesine sai qoldanylýyn qamtamasyz etý, zań talaptarynyń saqtalýyn turaqty baqylaýda ustaý – barlyq memlekettik organdar men mekemelerdiń ortaq mindeti ekeni aityldy.
Jiyn qorytyndysy boiynsha aýdan ákimderiniń apparattaryna, Bilim jáne Densaýlyq saqtaý basqarmalaryna memlekettik rámizderdi paidalaný barysynda anyqtalǵan zań buzýshylyqtardy joiý boiynsha qajetti sharalardy qabyldaý tapsyryldy. Sonymen qatar, Ishki saiasat basqarmasyna memlekettik organdarmen birlesip qoǵamdyq monitoring jumystaryn jalǵastyrý mindetteldi.
Komissiia músheleri jastar arasynda patriottyq tárbieni kúsheitý, memlekettik rámizderdiń máni men mańyzyn túsindirýge baǵyttalǵan is-sharalardy júieli túrde ótkizýdiń mańyzdylyǵyn atap ótti.
Otyrys qorytyndysynda memlekettik rámizderdi qurmetteý mádenietin qalyptastyrý, olardy paidalaný talaptarynyń saqtalýyn qamtamasyz etý jáne turǵyndar arasynda keńinen nasihattaý jumystaryn jalǵastyrý jóninde naqty tapsyrmalar berildi.
