Almatydaǵy mektepterdiń birinde birneshe oqýshy qatarlas qyzdy soqqyǵa jyǵyp, oqiǵanyń videosyn áleýmettik jelige jariialaǵan. Bul jaǵdai biyl naýryzda bolǵan, dep habarlaidy dalanews.kz.
Zardap shekken oqýshyǵa meditsinalyq, psihologiialyq jáne pedagogikalyq kómek kórsetilip jatyr.
Politsiianyń málimetinshe, videony áleýmettik jelige oqiǵaǵa qatysýshylardyń biri júktegen. Keiin jazba óshirilgenimen, oǵan deiin quqyq qorǵaý organdary videony zerttep, oqiǵaǵa qatysy bar barlyq adamdy anyqtap úlgergen.
Bul derek boiynsha Naýryzbai aýdandyq politsiia basqarmasy qylmystyq isti tergep jatyr. Politsiia bul is departament basshylyǵynyń erekshe baqylaýynda ekenin habarlady.
Quqyq qorǵaý organdary málimetinshe, sotqa deiingi tergeý aiaqtalǵan. Jaqyn ýaqytta oqiǵaǵa qatysqan barlyq oqýshy sot aldynda jaýap beredi.
