Almaty oblysynda birneshe jylǵa sozylǵan tergeý aiaqtalyp, esirtki óndirýmen jáne taratýmen ainalysqan transulttyq qylmystyq toptyń múshelerine qatysty sot úkimi shyqty, dep habarlaidy dalanews.kz.
Jýrnalist Mihail Kozachkovtyń málimetinshe, is materialdaryna sáikes, 2022 jyly Qazaqstanǵa qurylysshy retinde kelgen jeti Ýkraina azamaty keiin esirtki óndirý jáne taratý isine qatysy bar degen kúdikke ilingen. Tergeý barysynda olardyń Almaty mańynan eki úi men úsh avtokólik satyp alyp, birqatar ǵimarattar men garajdardy jalǵa alǵany anyqtalǵan.
Oqiǵanyń beti 2022 jylǵy 22 jeltoqsanda ashylǵan. Sol kúni kúdiktilerdiń ekeýi Qarashyńǵyl ańshylyq sharýashylyǵy aýmaǵyna barǵan. Olardyń kóligi jergilikti egerlerdiń nazaryn aýdarǵan. Tekserý kezinde kólikten zańsyz zat tabylmaǵanymen, egerler mańaidy qarap shyǵyp, butalardyń arasynan ishinde aq tústi untaq bar iri polietilen qapty anyqtaǵan. Osydan keiin olar politsiia shaqyrǵan.
Oqiǵa ornyna kelgen politseiler kúdiktilerdi ustap, olardyń turǵylyqty jerleri men jalǵa alǵan nysandarynda tintý júrgizgen. Tergeý barysynda úiler men garajdardan esirtki óndirýge arnalǵan himiialyq zattar, zerthanalyq jabdyqtar jáne daiyn ónim tárkilengen. Sondai-aq quqyq qorǵaý organdarynyń málimetinshe, kúdiktiler el aýmaǵyna esirtki jasaýǵa qajetti prekýrsorlardyń iri kólemin jetkizgen.
Alǵashynda ustalǵandar tergeýmen yntymaqtasyp, qoimalar men saqtaý oryndaryn kórsetken. Alaida keiin óz kinálaryn moiyndaýdan bas tartyp, Qazaqstanǵa qurylys jáne jóndeý jumystarymen ainalysý úshin kelgenderin aitqan.
Soǵan qaramastan sot usynylǵan dálelderdi zerttei kele, jeti azamattyń da esirtki óndirý jáne taratý qylmystaryna qatysy bar ekenin, sondai-aq olardyń transulttyq uiymdasqan qylmystyq top quramynda áreket etkenin anyqtaǵan.
Sot sheshimimen top múshelerine uzaq merzimge bas bostandyǵynan aiyrý jazasy taǵaiyndaldy. Al 35 jastaǵy Andrii Slivinskii qylmystyq toptyń jetekshisi retinde 20 jylǵa sottalǵan.
