Almaly aýdanynyń turǵyndarymen kezdesý barysynda Almaty ákimi Erbolat Dosaev aýdandaǵy jol infraqurylymyn damytý jáne jolaýshylar tasymalynyń sapasyn arttyrý jumystaryna toqtaldy, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
Megapolis basshysy búgingi tańda aýdanda aǵymdaǵy jóndeý aiasynda 25 myń sharshy metr jol tósemi jóndelgenin, al biylǵy jospar – 47 myń sharshy metr ekenin habarlady.
– Qazirdiń ózinde 2,3 shaqyrym trotýar jabdyqtalyp, 2 shaqyrym aryq jelisi salyndy, qazan aiynyń sońyna deiin taǵy 6,9 shaqyrym aryq qamtylady. Sondai-aq, ótken aida 14 kóshede 12,5 shaqyrym jolǵa ortasha jóndeý jumystary aiaqtaldy. Qyrkúiek aiynyń sońyna deiin Isaev kóshesinde uzyndyǵy 1,2 shaqyrym jolǵa ortasha jóndeý jumystary aiaqtalady, – dedi Erbolat Dosaev.
Qoǵamdyq kólikte qyzmet kórsetý sapasyn arttyrýǵa toqtalǵan Almaty ákimi biyl jyljymaly quram 101 avtobýsqa, 327-den 428 birlikke kóbeiip, 24 marshrýtta jańartylǵanyn aitty.
Jalpy, Almatyda biyl uzyndyǵy 250 shaqyrym bolatyn 274 kóshe ortasha jóndeýden ótti. Osylaisha jaqsy jáne qanaǵattanarlyq jaǵdaidaǵy joldyń úlesin 92%-ǵa deiin jetkizý josparlanyp otyr.
Buǵan qosa, jergilikti biýdjet esebinen gazben júretin 600 avtobýs, 100 elektrli avtobýs jáne 112 trolleibýs satyp alynady. Jeke avtoparkter osy jyldyń birinshi jartyjyldyǵynda gazben júretin 150 avtobýs pen 15 elektrobýs satyp aldy. Qazirgi ýaqytta qalanyń trolleibýs parki tolyǵymen jańartyldy.
